’پدماوت‘ کے خلاف پرتشدد مظاہرے، کرنی سینا نے بچوں کو بھی نہیں بخشا

فلم’ پدماوت ‘ کل ریلیز ہونے جا رہی ہے لیکن اس کی مخالفت نے تشدد کی شکل اختیار کر لی ہے۔ سپریم کورٹ سے ہری جھنڈی ملنے کے با وجود راجپوت کرنی سینا فلم’ پدماوت ‘ کے دکھائے جانے پر پابندی لگائے جانے کا مطالبہ کر رہی ہے اور اپنے مطالبہ کو لے کر کرنی سینا کے لوگ سڑکوں پر اتر آئے ہیں اور کئی ریاستوں میں پر تشدد مظاہرے کر رہے ہیں۔ افسوسناک بات یہ ہے کہ کرنی سینا کے اراکین نے گروگرام کے ایک اسکول بس کو بھی اپنا نشانہ بنایا اور اس میں توڑ پھوڑ کی۔ اس توڑ پھوڑ کی وجہ سے بس میں بیٹھے معصوم بچے بری طرح گھبرا گئے اور رونے لگے۔

ذرائع کے مطابق گروگرام واقع اسکول کی ایک بس میں ’پدماوت‘ فلم کی مخالفت کرنے والے لوگوں نے توڑ پھوڑ کی اور بچوں کو دہشت زدہ کر دیا۔ اس واقعہ کا ایک ویڈیو بھی ٹی وی چینلوں اور سوشل میڈیا پر وائرل ہو رہا ہے جس میں بچے روتے ہوئے نظر آ رہے ہیں اور بس کے شیشے ٹوٹے ہوئے ہیں۔ بچوں کو دلاسہ دیتی ہوئی ایک خاتون کی تصویر بھی اس میں دیکھنے کو مل رہی ہے۔ لیکن حیرانی کی بات یہ ہے کہ ہریانہ کی حکومت اس طرح کے واقعات پر قابو پانے میں اب تک ناکام ہی نظر آ رہی ہے۔

قابل ذکر ہے کہ کرنی سینا کے قائد لوکیندر کالوی نے آج پھر ایک مرتبہ یہ اعلان کیا کہ وہ اس فلم کو ریلیز نہیں ہونے دیں گے۔ انہوں نے یہ بھی تسلیم کیا کہ کرنی سینا کے لوگ تشدد میں شامل ہیں پر اس کے لئے وہ بالکل شرمندہ نہیں ہیں اور انہوں نے کہا کہ وہ معافی نہیں مانگیں گے۔ انہوں نے کہا کہ ’’رانی پدماوتی میری ماں ہیں، میں ان سے معافی مانگو ں گا‘‘۔

ادھر مظاہرین نے احمدآباد کے ہمالیہ مال میں توڑ پھوڑ کی اور وہاں کھڑی کئی گاڑیوں کو نذ ر آتش بھی کر دیا۔ ممبئی میں پولس نے حالات کو دیکھتے ہوئے کرنی سینا کے رہنماؤں کو گرفتار کرنا شرو ع کر دیا ہے۔ احمدآباد میں 44اور ممبئی میں 50 لوگوں کو خبر لکھے جانے تک گرفتار کیا جا چکا ہے۔

گجرات ملٹی پلیکس مالکان کی ایسو سی ایشن نے اعلان کیا ہے کہ ریاست میں کسی بھی تھیٹر میں فلم’پدماوت ‘ کو نہیں دکھایا جائے گا۔ اتر پردیش کے متھرا میں اس فلم کے خلاف مظاہرےہو رہے ہیں۔ مظاہرین نے دہلی۔ جےپور ہائی وے پر بھی مظاہرہ کیا جس کی وجہ سے ہائی وے پر زبر دست جام لگ گیا۔ ادھر ہریانہ، راجستھان اور مدھیہ پردیش میں بھی مظاہرے جاری ہیں۔