فلم شائقین کے ساتھ ساتھ مارکیٹ پر چھایا ’جوان‘ کا خمار، پی وی آر نے محض 35 منٹ میں کمائے 400 کروڑ روپے!

کنگ خان کے نام سے مشہور بالی ووڈ کے میگا اسٹار شاہ رخ خان کی فلم ’جوان‘ ریلیز ہو گئی ہے۔ اس فلم کا زبردست خمار فلم شائقین پر دیکھنے کو مل رہا ہے۔ نتیجہ یہ ہے کہ پی وی آر آئناکس کے شیئرس میں زبردست تیزی دیکھنے کو مل رہی ہے۔ یعنی فلم شائقین کے ساتھ ساتھ مارکیٹ پر ’جوان‘ کا خمار چھایا ہوا ہے۔ بھلے ہی جوان کی اوپننگ کا اندازہ 60 سے 75 کروڑ روپے لگایا جا رہا ہو، لیکن پی وی آر آئناکس کے مارکیٹ کیپ میں محض 35 منٹ میں 400 کروڑ روپے سے زیادہ کا اضافہ دیکھنے کو ملا ہے۔ مارکیٹ ایکسپرٹ کا اندازہ ہے کہ جمعرات کی دیر شب تک اوپننگ کے اعداد و شمار سامنے آئیں گے تو جمعہ کو مارکیٹ میں کمپنی کے شیئرس میں مزید اُچھال دیکھنے کو مل سکتا ہے۔

ایک دن پہلے ہی ترن آدرش نے ٹوئٹ کر جانکاری دی تھی کہ پی وی آر آئناکس میں 4.48 لاکھ ایڈوانس ٹکٹ کی بکنگ ہوئی ہے، جبکہ سنے پولس میں 1.09 لاکھ ٹکٹ کی ایڈوانس بکنگ ہوئی ہے۔ ترن آدرش نے آج کی کمائی کو لے کر بھی ایک ٹوئٹ کیا ہے جس میں بتایا ہے کہ جمعرات کو 12 بجے تک ’جوان‘ کی پی وی آر آئناکس 15.60 کروڑ روپے، سنے پولس میں 3.75 کروڑ روپے کی کمائی کر ڈالی ہے۔ فلم ’پٹھان‘ کی بات کی جائے تو پہلے دن کی مجموعی کمائی 27.02 کروڑ روپے تھی۔ دیگر فلموں کی بات کریں تو فلم ’کے جی ایف‘ (ہندی) کی 22.15 کروڑ روپے اور فلم ’وار‘ کی 19.67 کروڑ روپے کی کمائی پہلے دن ہوئی تھی۔ فلم ماہرین کی بات پر یقین کیا جائے تو ’جوان‘ کی پہلے دن کی اوپننگ 60 سے 75 کروڑ روپے ہو سکتی ہے۔

ایک اندازے کے مطابق دوپہر 12 بجے پی وی آر آئناکس نے ٹکٹ کھڑکی سے جوان کے ٹکٹ فروخت کر کے 15 کروڑ روپے سے زیادہ کی کمائی کر لی ہے، جو کہ پہلا دن ختم ہوتے ہوتے 35 سے 40 کروڑ روپے پہنچنے کے آثار ہیں۔ دوسری طرف مارکیٹ میں پی وی آر آئناکس نے محض 35 منٹ میں 400 کروڑ روپے سے زیادہ کی کمائی کر لی ہے۔ دراصل 9 بج کر 50 منٹ پر کمپنی کا شیئر 1869 روپے کے ساتھ دن کے ہائی پر پہنچا۔ اس وقت پی وی آر آئناکس کا مارکیٹ کیپ 1826.71 کروڑ روپے تھا۔ ایک دن پہلے جب بازار بند ہوا تھا تو مارکیٹ کیپ 17860.13 کروڑ روپے تھا۔ ایسے میں کمپنی کو مارکیٹ کیپ میں محض 35 منٹ میں 407.58 کروڑ روپے کا اضافہ دیکھنے کو ملا۔

ماہرین کا اندازہ ہے کہ پی وی آر آئناکس کا شیئر اپنے موجودہ 52 ہفتوں کے ریکارڈ کو توڑتے ہوئے 2000 روپے کی سطح کو پار کر سکتا ہے۔ موجودہ وقت میں کمپنی کا 52 ہفتوں کا ہائی 1974.75 روپے ہے جو 14 ستمبر 2022 کو پہنچا تھا۔ ایلارا کیپٹل نے پی وی آر آئناکس کو 2050 روپے کے ٹارگیٹ پرائم کے ساتھ شیئر کو خریدنے کا مشورہ دیا ہے۔ بروکریج فرم نے کہا کہ بہتر اشتہار، ریونیو گروتھ اور صحت مند آکیوپنسی کے سبب جولائی سے ستمبر سہ ماہی میں پی وی آر آئناکس کا منافع سب سے زیادہ ہو سکتا ہے۔