ہمیش ریشمیا کے والد وپن ریشمیا کا 87 سال کی عمر میں انتقال

مشہور موسیقار اور گلوکار ہمیش ریشمیا کے والد وپن ریشمیا کا 87 سال کی عمر میں انتقال ہو گیا۔ انہوں نے بدھ کو رات 8.30 بجے آخری سانس لی۔ وہ مشہور موسیقی ڈائرکٹر اور فلمساز تھے۔ وپن ریشمیا سانس لینے میں دقت اور عمر سے متعلق صحت مسائل سے پریشان تھے۔ انہیں علاج کے لیے ممبئی کے کوکیلابین دھیرو بھائی امبانی اسپتال میں داخل کرایا گیا تھا۔

بتایا جاتا ہے کہ وپن ریشمیا کی آخری رسومات 19 ستمبر کو ممبئی کے جوہو میں ادا کی جائے گی۔ ہمیش اپنے والد کو اپنا گرو مانتے تھے اور انہیں کافی عزت دیتے تھے۔ والد کے انتقال پر ہمیش ریشمیا کافی غمزدہ ہیں۔

ٹائمز آف انڈیا کی ایک رپورٹ کے مطابق ہمیش ریشمیا کے فیملی فرینڈ فیشن ڈیزائنر ونتا تھاپر نے والد وپن ریشمیا کے انتقال کی تصدیق کی ہے۔ ونیتا تھاپر نے ریشمیا خاندان سے اپنی قربت کا اظہار کرتے ہوئے کہا کہ ان کے لیے یہ ایک کنبہ کی طرح ہے اور وہ آنجہانی وپن ریشمیا کو ایک والد کی طرح مانتی تھیں۔ انہوں نے کہا کہ جب وہ ٹی وی سیریل بنا رہے تھے تب سے میں انہیں پاپا کہتی تھی، بعد میں وہ ایک موسیقی ڈائرکٹر بن گئے اور پھر ہمیش ان کے نقش قدم پر چلے۔

غور طلب رہے کہ وپن ریشمیا نے 'دی ایکسپوز' (2014) اور 'تیرا سُرور' (2016) میں ایک فلمساز کے طور پر کام کیا تھا۔ وپن نے انصاف کا سورج (1990) کے نام سے ایک اَن ریلیزڈ فلم کے لیے موسیقی تیار کیا تھا۔ کہا جاتا ہے کہ ایک بار ہمیش ریشمیا نے بتایا تھا کہ ان کے والد اور سلمان خان ایک فلم پر تعاون کرنے والے تھے، اور اسی طرح ان کی سلمان سے ملاقات ہوئی تھی۔ اپنے والد کے ذریعہ انہیں ملوانے کے بعد ہمیش کو سلمان اور کاجول کی 1998 میں آئی فلم 'پیار کیا تو ڈرنا کیا' میں ایک بڑا بریک ملا تھا جس کے بعد وہ کافی مشہور ہو گئے تھے۔