یومِ پیدائش پر خصوصی: جگجیت سنگھ نے غزل گائیکی کو نئی پہچان عطا کی

بالی ووڈ میں جگجیت سنگھ کا نام ایک ایسی شخصیت کے طور پر یاد کیا جاتا ہے جنہوں نے اپنی غزلوں سے تقریباً چار دہائیوں تک سامعین کے دلوں پر انمٹ چھاپ چھوڑی ہے۔ آٹھ فروری 1941 کو راجستھان کے شری گنگا نگر میں پیدا ہوئے جگجیت سنگھ کا نام جگموہن تھا لیکن اپنے والد کے کہنے پر انہوں نے اپنا نام بدل دیا۔ بچپن سے ہی ان کی موسیقی کی جانب دلچسپی تھی۔ انہوں نے موسیقی کی تعلیم استاد جمال خان اور پنڈت چھگن لال شرما سے حاصل کی۔

سال 1965 میں پلے بیک سنگر بننے کی تمنا لئے جگجیت سنگھ ممبئی آگئے۔ ابتدائی دور میں انہیں اشتہاری فلموں کے لئے گانے کا موقع ملا۔ اس دوران ان کی ملاقات پلے بیک سنگر چترا دتہ سے ہوئی۔ سال 1969 میں جگجیت سنگھ نے چترا سے شادی کرلی۔اس کے بعد جگجیت - چترا کی جوڑی نے کئی البموں میں اپنی جادوئی آواز سے سامعین کو محظوظ کیا۔

جگجیت سنگھ نے پرائیوٹ البم میں اپنی آواز کے ساتھ کئی فلموں میں اپنی آواز دی۔ سال 2003 میں جگجیت سنگھ کو ہندستانی حکومت کی جانب سے پدبھوشن سے نوازا گیا۔ اپنی آواز سے سامعین کے درمیان انمٹ نقوش چھوڑنے والے جگجیت سنگھ نے 10 اکتوبر 2011 کو اس دنیا کو الوداع کیا۔ جگجیت سنگھ کے گائے ہوئے گانوں کی لمبی فہرست ہے اور لوگوں میں خوب سنے جاتے ہیں۔ ان میں سے کچھ گانے اس طرح ہیں: ہونٹوں سے چھو لو تم ، میرا گیت امر کردو، جھکی جھکی سی نظر، تم اتنا جو مسکرا رہی ہو، تم کو دیکھا تو یہ خیال آیا، تیرا گھر یہ میرا گھر، چٹھی نہ کوئی سندیش ، ہوش والوں کو خبر کیا وغیرہ۔