بالی ووڈ کی ایک باکمال اداکارہ- سادھنا

نئی دہلی: ہندی سینما کی مایہ ناز اداکارہ سادھنا شیوداسانی کی پیدائش 2 ستمبر 1941 کو کراچی میں ہوئی تھی۔ وہ اپنے والدین کی اکلوتی اولاد تھی اور8 سال کی عمر تک ان کی ماں نے انہیں گھر میں ہی تعلیم و تربیت دی۔ سادھانا کا نام ان کے والد کی پسندیدہ اداکارہ سادھنا بوس کے نام پر رکھا گیا تھا۔ ان کے والد اداکار ہری شودسانی کے بھائی تھے جو اداکارہ ’ببیتا‘ کے والد تھے۔

سادھنا نے ماضی میں اپنی لازوال اداکاری سے انڈسٹری میں خوب نام کمایا۔ انہوں نے متعدد فلموں میں راج کپور، دیوآنند، راجند کمارکے ساتھ بطور ہیروئن کام کیا اور بالی ووڈ انڈسٹری پر کئی دہائیوں تک راج کرتی رہیں۔ انہوں نے 1955 میں راج کپورکی فلم ’شری 420‘ کے ایک مشہور گانے ’مڑمڑ کہ نہ دیکھ مڑمڑکے‘ میں اپنا ڈیبیو کیاتھا۔ اس وقت ان کی عمر محض 15 برس تھی۔

بطور اداکارہ ’لو ان شملہ‘ ان کی ایسی پہلی فلم تھی جو ان کی منفرد پہچان کا سبب بنی۔ اسی فلم نے انہیں شہرت کی نئی بلندیاں عطا کیں۔

سادھنا نے اپنے منفرد اوراچھوتے ہیراسٹائل کی وجہ سے کافی شہرت حاصل کی اور ان کی زلفوں کاا سٹائل ’سادھنا کٹ‘ کے نام سے دنیا بھر میں مشہور ہوا جس میں ان کے آگے کے قدرے چھوٹے کٹے ہوئے بال پیشانی پر نظر آتے ہیں۔ سادھنا کی کامیاب فلموں میں ’لو ان شملہ‘، ’پرکھ‘، میرا سایہ، ہم دونوں، ایک پھول دو مالی، من موجی، دلہا دلہن، آرزو، ’میرے محبوب‘، ’وہ کون تھی اور ’وقت‘ سمیت متعدد فلمیں شامل ہیں۔

سادھنا کو 2002 میں لائف ٹائم اچیومنٹ ایوارڈ سے بھی نوازا گیا۔ ان کی شادی ان کی پہلی فلم کے ہدایت کار رام کرشن نیّر سے ہوئی تھی اور ان کے کوئی اولاد نہیں تھی۔ سادھنا کے کنبہ میں ایک گود لی ہوئی بیٹی ہے۔ سادھنا کے شوہر رام کرشن نیئر کا انتقال سال 1995 میں دمے کی بیماری کے سبب ہو گیا تھا۔

سادھنا نے فلم گیتا میرا نام کی ہدایت کاری بھی کی تھی جن میں اُن کے ساتھ اداکار فیروز خان اور سنیل دت تھے۔ دلیپ کمار کے ساتھ کام کرنے کی اُن کی خواہش پوری نہ ہوسکی۔ حالانکہ 70 ء کی دہائی میں فلم سنگھرش کا جس وقت اعلان ہوا تھا اُس وقت دلیپ کمار کے ساتھ ہیروئن کے طور پر سادھنا کے نام کی تشہیر کی گئی تھی لیکن بعد میں اُن کی جگہ وجینتی مالا آگئیں۔

سادھنا کا فلمی کیریئر بہت طویل نہ تھا اور 1974 میں شمی کپور کے ساتھ انہوں نے آخری فلم چھوٹے سرکار میں کام کیا، جو شمی کپور کی بھی بطور ہیرو آخری فلم تھی، تا ہم شمی اس کے بعد بھی فلموں میں اداکاری کرتے رہے، مگر سادھنا نے فلموں سے کنارہ کر لیا۔

1989 میں ان کی پروڈکشن کمپنی نے ڈمپل کپاڈیا کے ساتھ فلم بنائی اور اس میں سادھنا نے ہدایت کاری کے فرائص بھی انجام دئیے۔ ان کی قریبی سہلیوں میں آشا پاریکھ، وحیدہ رحمان، ہیلن، جرگ رچرڈسن اور نندہ تھیں۔ سادھنا نے 34 فلموں میں اپنی اداکاری کے جوہر دکھائے۔ ان کی آخری فلم ’’الفت کی نئی منزلیں‘‘ (1994) میں ریلیز ہوئی تھی۔

سادھنا جنھوں نے برسوں قبل کسی انٹرویو کے دوران کہا تھا کہ ’’وہ اپنے تمام دوستوں کے ساتھ کرسمس کا تہوار بڑے زور و شور سے مناتی ہیں‘‘ لیکن 2015ء کا کرسمس اُن کی موت کا پیغام لے کر آیا اور وہ اس دنیا کو خیرباد کہہ گیئں۔