سعودی عرب میں رمضان میں آن لائن خریداری میں اضافہ متوقع

الریاض: سعودی عرب میں اس مرتبہ رمضان المبارک کے دوران میں آن لائن خریداری کے حجم میں اضافہ متوقع ہے۔ چیک آؤٹ ڈاٹ کام کے سروے کے مطابق قریباً 73 فی صد لوگ رمضان میں آن لائن مصنوعات اور خدمات کی خریداری کا ارادہ رکھتے ہیں۔گذشتہ سال بھی کم وبیش اتنی ہی تعداد میں لوگوں نے آن لائن خریداری کی تھی۔

البتہ ان کے مقابلے میں قریباً 23 فی صد لوگوں کا کہنا ہے کہ وہ خود دکانوں یا خریداری مراکز پر جاکر اشیائے ضروریہ یا سروسز خرید کرنا چاہتے ہیں۔ سروے میں مختلف عمروں کے گروپوں کے خریداری رجحانات کا بھی جائزہ پیش کیا گیا ہے۔ اس کے مطابق زیادہ صاحب ثروت اور 18 سے 34 سال کی عمر کے لوگ دوسرے کے مقابلے میں زیادہ آن لائن خریداری کریں گے۔

اس سروے کے مطابق سعودی عرب میں لوگ گذشتہ رمضان کے مقابلے میں اس مرتبہ زیادہ متنوع مصنوعات خرید کرنے کا ارادہ رکھتے ہیں۔البتہ خریداروں کا زیادہ مقبول زمرہ تو اشیائے صرف ہی ہیں۔سروے میں حصہ لینے والے 54 فی صد افراد کا کہنا تھا کہ وہ آن لائن اشیائے ضروریہ خرید کرنے کا ارادہ رکھتے ہیں،46 فی صد کپڑے اور 45 فی صد خوراک کی اشیاء اور 40 فی صد گھریلو استعمال کی دوسری اشیاء خرید کرنا چاہتے ہیں۔

آن لائن خریداری کرنے والوں میں زیادہ تر صارفین (64 فی صد) کارڈ یا ڈیجیٹل والٹ کے ذریعے رقوم ادا کرتے ہیں۔سروے کے مطابق رمضان میں ڈیجیٹل شکل میں رقوم کی ادائی سال کے باقی دنوں کے مقابلے میں زیادہ ہوسکتی ہے۔

(بشکریہ العربیہ ڈاٹ نیٹ)