اسرائیلی فضائیہ نے حماس کے ٹیکنیکل آفس کو اڑا دیا

اسرائیل کے فلسطین پر فضائی حملہ بدستور جاری ہیں جن کے نتیجےمیں غزہ میں زبردست جانی اور مالی نقصان ہو رہا ہے۔ متعدد لوگ شہید ہوگئے ہیں اور بڑی تعداد میں لوگ بے گھرہو گئے ہیں۔ ان حملوں میں ایک خاصی تعداد میں معصوم بچے شہید ہو گئےہیں ۔

اطلاعات ہیں کہ اسرائیلی فضائیہ نے شمالی غزہ پٹی میں جنگجو تنظیم حماس کے ٹیکنیکل آفس کو بمباری کرکے تباہ کر دیا ہے۔ اسرائیلی ڈیفنس فورسز (آئی ڈی ایف) نے بدھ کے روز یہ اطلاع دی۔ آئی ڈی ایف نے ٹویٹ کیا کہ کچھ وقت پہلے ہی فضائیہ کے جنگی طیاروں نے حماس کے ٹیکنیکل آفس کی ایک عمارت کو نشانہ بنایا اور یہ کاروائی جابلیہ علاقے میں کی گئی ہے۔

غورطلب ہے کہ مشرقی یروشلم میں قدیم زمانے سے آباد فلسطینی خاندانوں کو منصوبہ بند ڈھنگ سے ہٹانے کے سلسلے میں اسرائیل اور فلسطین کے مابین حالیہ برسوں میں زبردست جنگ ہوئی ہے جس میں دونوں جانب کئی افراد زخمی ہوئے ہیں۔ فلسطینی باغیوں نے غزہ پٹی سے اسرائیلی علاقوں کو نشانہ بناتے ہوئے سیکڑوں راکٹ داغے تھے اور اسرائیلی ڈیفنس فورسز نے بھی اس کا سخت جواب دیا ہے۔

گذشتہ کئی دنوں سے جاری ان جھڑپوں میں فلسطین میں 61 بچوں سمیت 200 سے زائد افراد کی موت ہوئی اور ہزاروں افراد زخمی ہوئے ہیں جبکہ اسرائیل میں 10 افراد کی موت کی تصدیق ہوئی ہے اور 50 سے زائد افراد سنگین طور پر زخمی ہیں۔