اردوگان اور زیلنسکی نے یوکرین کے بحران اور غزہ کشیدگی پر کیا تبادلہ خیال

ترکی کے صدر رجب طیب اردوگان نے یوکرین کے صدر ولادیمیر زیلنسکی کے ساتھ یوکرین کے بحران اور غزہ پٹی میں اسرائیل-فلسطینی تنازعہ پر تبادلہ خیال کیا یہ اطلاع ترک صدر کے دفتر نے ہفتے کے روز دی۔ دفتر نے کہا ’’بات چیت کے دوران، دونوں رہنماؤں نے روس-یوکرین جنگ کے ساتھ ساتھ اسرائیل اور فلسطین کے درمیان تنازعہ اور خطے میں انسانی بحران پر تبادلہ خیال کیا۔‘‘

مسٹر اردوگان نے یہ بھی کہا کہ اسرائیل فلسطین تنازعہ کو پرامن طریقے سے حل کیا جاسکتا ہے اور ترکی اس سمت میں کوششیں جاری رکھے گا۔

دفتر نے بعد میں کہا کہ مسٹر اردوگان نے یوگانڈا کے صدر یوویری میوسیوینی سے فون پر بات کی۔ اس دوران انہوں نے کہا کہ دنیا کے سبھی ممالک کو غزہ میں جلد جنگ بندی کی اپیل کرنا چاہیے۔اس کے علاوہ مسٹر اردوگان نے نارتھ اٹلانٹک ٹریٹی آرگنائزیشن (نیٹو) کے سیکریٹری جنرل جینز اسٹولٹن برگ سے بھی فون پر بات کی۔

صدر کے دفتر نے کہا “مغربی ممالک کے رویے سے غزہ میں انسانی حقوق کی خلاف ورزیوں میں اضافہ ہو رہا ہے۔ اگر مغربی ممالک نے اسرائیل کو روکنے کے لیے کوششیں نہ کیں تو اس کے ناقابل تلافی نتائج ہوں گے۔ مسٹر اردوگان نے کہا کہ فوری کارروائی کی جائے تاکہ انسانی المیے کو ختم کیا جاسکے۔