لبنان پر اسرائیلی فضائی حملوں میں گیارہ افراد کی موت

جنوبی اور مشرقی لبنان پر ہفتے کے روز اسرائیلی فضائی حملوں میں گیارہ افراد ہلاک اور گیارہ دیگر زخمی ہو گئے۔ سرکاری نیشنل نیوز ایجنسی (این این اے) نے یہ اطلاع دی ہے۔ این این اے کے مطابق، مشرقی بعلبیک-ہرمیل صوبے کے گاؤں خریبہ میں ایک گھر پر اسرائیلی حملے میں ایک ہی خاندان کے چھہ افراد ہلاک اور گیارہ  دیگر زخمی ہو گئے۔ اس کے علاوہ میونسپل گودام کو نشانہ بنانے والے اسرائیلی حملے میں نباتیہ میونسپلٹی کے پانچ ملازمین بھی مارے گئے۔

فوجی ذرائع نے بتایا کہ اسرائیلی جنگی طیاروں اور ڈرونز نے ہفتے کے روز جنوبی اور مشرقی لبنان کے گاؤوں اور قصبوں پر تقریباً نوے حملے کیے اور سولہ گاؤں اور قصبوں پر تقریباً  پچھتر  گولے داغے۔ حزب اللہ نے کل الگ الگ بیانات میں اعلان کیا کہ اس نے جنوبی لبنان کے گاؤں چاما میں اسرائیلی مرکاوا ٹینک کو گائیڈڈ میزائل سے تباہ کر دیا جس سے اس کے عملے کو جانی نقصان پہنچا۔

انہوں نے کہا کہ اس نے جنوبی لبنان کے سرحدی شہروں میں گھسنے والے اسرائیلی فوجیوں اور گاڑیوں کو میزائلوں سے نشانہ بنایا اور کئی اسرائیلی مقامات پر راکٹ فائر کیے جن میں ایکر، حیفہ، صفد اور کریات شمونہ کے شہر شامل ہیں۔

لبنان کی وزارت صحت کے مطابق 8 اکتوبر 2023 کو جنگ کے آغاز سے اب تک لبنان پر اسرائیلی فضائی حملوں میں مرنے والوں کی تعداد 3,452 اور زخمیوں کی تعداد 14,664 تک پہنچ گئی ہے۔