بغداد میں خودکش دھماکے،25 افراد ہلاک،63زخمی

بغداد: عراق کے دارالحکومت بغداد میں دو خود کش حملے میں آج 25 افرادکی موت جبکہ 63 دیگر زخمی ہو گئے۔عراق کی وزارت صحت نے اپنے فیس بک پیج پر اس حملے کی تصدیق کی ہے۔ انہوں نے کہا کہ یہاں کے ایک تجارتی مرکز کو حملہ آوروں نے نشانہ بنایا۔

عراقی دارالحکومت بغداد میں گزشتہ تین روز کے دوران یہ دوسرا دہشت گردانہ حملہ ہے۔

عراقی حکام کے مطابق دو حملہ آوروں نے بغداد کے مصروف تجارتی علاقے طیارن اسکوائر میں خود کو دھماکے سے اڑادیا، دھماکوں میں 25افراد ہلاک اور63 زخمی ہوگئے۔ طیارن اسکوائر پربڑی تعداد میں مزدور روزانہ اجرت پرکام کے لئے جمع ہوتے ہیں، جہاں ماضی میں بھی اسی نوعیت کے حملے ہوچکے ہیں۔

فوری طور پر کسی تنظیم نے حملے کی ذمہ داری قبول نہیں کی ہے۔