خاتون کو قتل کر کے لاش خنزیروں کو کھلا دی

روم سے جمعرات سات جنوری کو ملنے والی رپورٹوں میں اطالوی مافیا کا حوالہ دیتے ہوئے بتایا گیا ہے کہ اس خوفناک جرم کا ارتکاب 2016ء میں کیا گیا تھا۔ اپنی گمشدگی سے قبل اس 42 سالہ کاروباری خاتون نے اپنی ملکیتی زمین اپنے ایک ہمسائے کو بیچنے سے انکار کر دیا تھا۔ اس کے ہمسائے کے جرائم پیشہ افراد کے مقامی مافیا گروہ کے ساتھ قریبی رابطے تھے۔

بہت بااثر مافیا گروہ

نیوز ایجنسی اے ایف پی نے لکھا ہے کہ ماریا چندامو نامی اس خاتون کے قتل کی تصدیق سے اٹلی کے مغربی ساحلی علاقے کالابریا میں کئی مردوں اور عورتون کے اچانک لیکن ہمیشہ کے لیے لاپتہ ہو جانے کے واقعات میں سے ایک اور واقعہ اب حل ہو گیا ہے۔

مقتولہ خاتون کالابریا کے خطے میں لمبادی کے بلدیاتی علاقے کی رہنے والی تھی اور چھ مئی 2016ء کے دن اپنے فارم کے باہر سے اچانک غائب ہو گئی تھی۔ اس علاقے میں 'ایندرنگیتا‘ نامی وہ مافیا گروہ بہت بااثر ہے، جس کا شمار اٹلی کے بڑے اور منظم جرائم یشہ گروہوں میں ہوتا ہے۔

جیل میں اعتراف جرم

ماضی میں مافیا کا ایک اہم رکن رہنے والے لیکن اب اطالوی حکام کے ساتھ تعاون کرنے والے انتونیو کوسی دینتے نامی شہری نے بتایا کہ اسے 'ایندرنگیتا‘ مافیا کے ایک مقامی رہنما نے بتایا تھا کہ ماریا چندامو کی موت اس سے لیے جانے والے مافیا انتقام کا نتیجہ تھی۔

کوسی دینتے کے اس بیان کی کالابریا کے مقامی میڈیا میں شائع ہونے والی تفصیلات کے مطابق اس اطالوی کاروباری خاتون کو علاقائی مافیا کے ارکان نے پہلے بڑی بےدردی سے قتل کیا تھا اور پھر اس کی لاش ٹکڑے ٹکڑے کر کے خنزیروں کو کھلا دی گئی تھی۔

کوسی دینتے کے مطابق اسے یہ تفصیلات ایمانوئل مانکوسو نے اس وقت بتائی تھیں، جب وہ 'ایندرنگیتا‘ مافیا کی جرائم کی دنیا چھوڑ چکا تھا اور کوسی دینتے کو جیل میں ملا تھا۔

جرم کے ناکافی شواہد

حیران کن بات یہ ہے کہ اٹلی کی خصوصی اینٹی مافیا پولیس کے تفتیش کاروں کے لیے ماضی میں یہ بات بھی مشکلات کا باعث بنی تھی کہ ماریا چندامو کے لاپتا ہو جانے سے ایک سال قبل اس کے شوہر نے بظاہر خود کو گولی مار کر خود کشی کر لی تھی۔ اب لیکن پولیس کے مطابق تقریباﹰ ساڑھے چار سال قبل اس خاتون کی اچانک گمشدگی کا معمہ کافی حد تک حل ہو گیا ہے۔