شاہ زکریا (حاجی پیر) اسکول جمعیۃ چلڈرن ولیج کو گجرات بورڈ امتحانات میں ملی نمایاں کامیابی

انجار: گجرات میں 2001 کے دوران آئے زلزلہ کے بعد جمعیۃ علماء ہند کی طرف سے قائم کردہ جمعیۃ چلڈرن ولیج میں واقع شاہ زکریا (حاجی پیر) سیکنڈری اور ہائر سیکنڈری اسکول کے دسویں کے طلبا و طالبات نے مارچ 2024 میں منعقد گجرات بورڈ کے امتحانات میں 93.75 فیصد کامیابی حاصل کی ہے۔ گزشتہ دنوں برآمد بارہویں کے ریزلٹ میں بھی اس اسکول نے نمایاں کامیابی حاصل کی تھی۔

اس شاندار کارکردگی میں اس اسکول کی طالبہ اگاریہ رونیشا رجک بھائی 91.13 فیصد کے ساتھ سر فہرست رہی۔ کاٹیا عرفان رسول بھائی 86.84 فیصد، رائمہ خالد آدم بھائی 84.85 فیصد، عابدہ شاہین سلیم بھائی 83.88 فیصد اور منگاریا نواب محمد داؤد بھائی 79.78 فیصد کے ساتھ دیگر نمایاں کارکردگی انجام دینے والے طلبا و طالبات رہے۔

اس کامیابی کے موقع پر جمعیۃ چلڈرن ولیج کے سرپرست مولانا محمود اسعد مدنی صدر جمعیۃ علماء ہند نے اسکول انتظامیہ کو عمدہ کامیابی پر مبارک باد دی ہے۔ انھوں نے اس اسکول کے نگراں مولانا حکیم الدین قاسمی جنرل سکریٹری جمعیۃ علماء ہند، پرنسپل رحیمہ بین قریشی، محنتی اساتذہ اور مفتی انیس پرتاپ گڑھی کو مبارکباد پیش کی ہے۔

واضح ہو کہ کَچھ بھج تعلیمی اعتبار سے کافی پسماندہ علاقہ ہے۔ ایسے علاقے میں مثبت ماحول میں عصری تعلیم کے لیے یہ ادارہ ایک مرکز بن گیا ہے۔ اس اسکول کو ہر سال پوری ریاست کے اسکولوں میں نمایاں مقام ملتا رہا ہے۔ گجرات میں مجموعی کامیابی فیصد 64 رہتی ہے، جو اس سال بڑھ کر 82 ہو گئی ہے، حالانکہ جمیعۃ کے اس اسکول نے لگاتار چوتھے سال صد فیصد کامیابی حاصل کی ہے۔

اس سال 1,389 اسکولوں نے 100 فیصد نتیجہ درج کیا ہے، جبکہ 2023 میں 272 اور 2022 میں 292 ایسے اسکول تھے۔ اس مرتبہ صرف 264 اسکولوں نے 30 فیصد سے کم نتیجہ درج کیا ہے۔ پچھلے سال، 30 فیصد سے کم رزلٹ والے اسکولوں کی تعداد 1084 تھی، جبکہ 2022 میں یہ تعداد 1007 تھی۔