حکومت پاکستان نے عمران خان کی تقاریر اور پریس کانفرنس کے نشریہ پر عائد کی پابندی، سبھی چینلوں کو حکم جاری

پاکستان حکومت نے سابق وزیر اعظم عمران خان کی تقریر اور ان کی پریس کانفرنس کے نشریہ پر ملک گیر پابندی عائد کر دی ہے۔ پاکستان کے الیکٹرانک میڈیا ریگولیٹری اتھارٹی نے سبھی ٹی وی چینلوں کو حکم دیا ہے کہ عمران خان کی کسی بھی تقریر اور ان کی کسی بھی پریس کانفرنس کو نشر نہ کیا جائے۔

واضح رہے کہ دو دن قبل ایک ریلی کے دوران عمران خان پر فائرنگ ہوئی تھی۔ میڈیا رپورٹس کے مطابق عمران خان کو بھی گولیاں لگی تھیں اور ان کا علاج چل رہا ہے۔ اس حملے کے لیے عمران خان نے کھل کر پاکستان کے وزیر اعظم شہباز شریف، پاکستان کے وزیر داخلہ رانا ثناء اللہ اور ایک فوجی افسر پر الزام عائد کیا تھا۔

ان الزامات سے بوکھلائی حکومت پاکستان نے اب عمران خان کی کسی بھی پریس کانفرنس کے نشریہ پر پوری طرح روک لگا دی ہے۔ فائرنگ میں زخمی ہونے کے بعد عمران خان سامنے آئے تھے اور انھوں نے کہا تھا کہ انھیں حملے کے بارے میں پہلے سے پتہ تھا۔ انھوں نے کہا تھا کہ ان کے اوپر چار گولیاں چلائی گئیں۔ عمران خان نے بڑا الزام عائد کرتے ہوئے کہا تھا کہ میجر جنرل فیصل نے انھیں ’سیدھا کرنے کی دھمکی‘ دی تھی۔ انھوں نے یہ الزام بھی لگایا تھا کہ ان کے اراکین پارلیمنٹ کو ڈرایا دھمکایا جا رہا ہے۔