پاکستان: فائرنگ میں زخمی عمران خان کو لاہور کے شوکت خانم اسپتال کیا گیا منتقل

اسلام آباد: پاکستان تحریک انصاف (پی ٹی آئی) کے چیئرمین اور پاکستان کے سابق وزیر اعظم عمران خان گوجرانوالہ ضلع کے وزیر آباد شہر میں قاتلانہ حملے میں زخمی ہو گئے ہیں۔ جس کے بعد انہیں لاہور کے شوکت خانم اسپتال لاہور منتقل کیا گیا ہے۔ اس اسپتال کو عمران خان نے اپنی والدہ کی یاد میں قائم کیا تھا۔

عمران خان پر جس وقت فائرنگ کی گئی ان کا قافلہ وزیر آباد میں داخل ہو رہا تھا۔ ان کے قافلہ میں شامل کنٹینر پر فائرنگ کی گئی، جس میں عمران خان سمیت دیگر پارٹی رہنما زخمی ہوئے۔ عمران خان کو ٹانگ میں گولی لگی انہیں زخمی حالت میں شوکت خانم اسپتال لاہور منتقل کردیا گیا، جہاں ان کا مکمل معائنہ کیا جائے گا۔ طبی معائنے کے دوران دیکھا جائے گا کہ گولی ان کی ٹانگ کو چھو کر گزری ہے یا پھر آر پار ہو گئی۔

ادھر، شوکت خانم اسپتال میں عمران خان کے فوری علاج کےلئے ضروری انتظامات مکمل کر لئے گئے ہیں۔ ڈاکٹر فیصل سلطان کا کہنا ہے کہ سابق وزیراعظم کو شوکت خانم لایا جا رہا ہے اور اسپتال میں عمران خان کے فوری علاج کے لئے ضروری انتظامات مکمل ہیں۔

ڈاکٹر فیصل سلطان کا کہنا تھا کہ عمران خان راستے میں ہیں، کچھ ہی دیر میں شوکت خانم اسپتال پہنچ جائیں گے۔ ابھی تک زخموں کی نوعیت کا اندازہ نہیں۔ طبی معائنہ کے بعد ہی زخموں کی تفصیلات سامنے آئیں گی۔

خیال رہے کہ اب سے تھوڑی دیر قبل اللہ والا چوک پر پی ٹی آئی کے کینٹینر پر فائرنگ سے ایک شخص جاں بحق اور چیئرمین پی ٹی آئی عمران خان اور سینیٹر فیصل جاوید سمیت 8 افراد زخمی ہیں۔