وسندھرا کا متنازعہ بل :وکلاء آج عدالتی کارروائی کا بائیکاٹ کریں گے

جے پور۔ راجستھان اسمبلی میں پیش کئے سی آر پی سی امینڈمنٹ آرڈیننس 2017 (کریمنل لاء ترمیمی آر ڈیننس ) کے خلاف راجستھان کے ہائی کورٹ میں عرضی داخل کی گئی ہے جس پر 27 اکتوبر کو سماعت ہوگی۔ جے پور میں وکلاء نے بھی اس کی پر زور مخالفت کی اور آج عدالتی کارروائی کا بائیکاٹ کرنے کا اعلان کیا ہے۔ جے پور میں صحافی بھی احتجاجی مظاہرے میں شامل ہوں گے۔

راجستھان ہائی کورٹ نے آرڈیننس کو چیلنج کرنے والی بھگوت گوڑ کی عرضی کو منظور کر لیا ہے۔ عرضی سے وابستہ اجے کمار جین نے قومی آواز کو بتایا کہ ، ’’راجستھان کی وزیر اعلیٰ وسندھرا راجے اور اس کے سینئر افسران اس قانون کو لانے کی تیاری گزشتہ دو سالوں سے کر رہے ہیں۔ وہ اپنے مؤثر وزراء اور خاص طور سے سینئر افسران کو کسی بھی طرح کے الزامات سے بچانا چاہتی ہیں۔ ‘‘ اجے کمار نے مزید کہا، ’’ تمام بد عنوان لوگ کسی بھی طرح کے سوال اور جوابدہی سے بچے رہیں اسی مقصد سے ایک پورے طبقہ کو اس میں شامل کیا گیا ہے۔ نہال چند جیسے وزراء بد عنوانی کے کئی سنجیدہ معاملات میں پھنسے ہوئے ہیں اور ان کے ساتھ جو افسران طبقہ اس میں ملوث ہے وہ بھی خود کو بچانے کی کوشش کر رہا ہے۔ یہ آرڈیننس سراسر غیر قانونی ہے اور اس لئے ہم اسے چیلنج کر رہے ہیں۔‘‘

غورطلب ہے کہ پیپلز یونین فار سول لبرٹیز (پی یو سی ایل ) بھی اس آرڈیننس کو چیلنج کرنے کے لئے جلد ہی قانونی اقدام اٹھانے جا رہا ہے۔ اس حوالہ سے پی یو سی ایل کی کویتا شریواستو نے بتایا کہ دی ڈسٹرکٹ بار ایسو سی ایشن ، جے پور نے اس آرڈیننس کی مخالفت کرتے ہوئے تمام وکلاء سے اس تاناشاہی سے پر آرڈیننس کے خلاف کھڑے ہونے کی اپیل کی ہے۔ ادھر کل اسمبلی میں بل پیش کرنے کے بعد جو ماحول بنا اس نے وزیر اعلی وسندھرا راجے کو اس بل پر از سر نو غور کرنے پر مجبور کیا اور ذرائع کے مطابق وزیر ایلی نے اپنے سینئر وزراء کے ساتھ میٹنگ کی۔