گاندھی جی کا مجسمہ توڑے جانے پر پرینکا گاندھی برہم، بزدلوں کی کرتوت قرار دیا

نئی دہلی: کانگریس کی جنرل سکریٹری پرینکا گاندھی نے مہاتما گاندھی اور بابا صاحب بھیم راؤ امبیڈ کر کے مجسمے توڑے جانے کے واقعہ کو عظیم لوگوں کی توہین قرار دیتے ہوئے کہا کہ رات کے اندھیرے میں اس طرح کے واقعات کو انجام دینے والے لوگ بزدل ہوتے ہیں۔

پرینکا گاندھی نے ہفتہ کو کہا کہ اتر پردیش کے جالون میں کچھ سماج دشمن عناصر نے بابائے قوم مہاتما گاندھی کے مجسمہ کو نقصان پہنچایا ہے۔ یہ بابائے قوم کی توہین ہے اور یہ بے وقوف لوگ مسلسل اس طرح کے واقعات کو انجام دے رہے ہیں لیکن ان کو سمجھ لینا چاہیے کہ اس سے ان عظیم لوگوں کی عظمت ذرا بھی متاثر نہیں ہوگی۔

انہوں نے ٹوئٹ کیا کہ کچھ دن پہلے اترپردیش میں بابا صاحب امبیڈکر کے مجسمہ کو سماج دشمن عناصر نے توڑا۔ اب جالون میں مہاتما گاندھی کے مجسمہ کو توڑا گیا۔ مجسمے توڑنے والے بزدلو! زندگی میں یہ تمہاری کامیابی ہے کہ رات کے اندھیرے میں چھپ کر تم ملک کے عظیم لوگوں کی توہین کرنے کی کوشش کرتے ہو؟ مجسموں پر حملہ کر کے ان عظیم لوگوں کی عظمت پر تم ایک ضرب بھی نہیں لگا سکتے۔

واضح رہے کہ اُرئی علاقہ کے گاندھی انٹر کالج میں نصب بابائے قوم مہاتما گاندھی کے مجسمہ کو کچھ غیر سماجی عناصر کی طرف سے نقصان پہنچایا گیا۔ پولس سپرنٹنڈنٹ ستیش کمار نے بتایا کہ گاندھی انٹر کالج کے پرنسپل روی کمار اگروال نے کوتوالی میں شکایت دے کر کہا کہ طے شدہ وقت کے مطابق جب ہفتہ کی صبح وہ کالج پہنچے تو انہوں نے دیکھا کہ مہاتما گاندھی کا مجسمہ خرد برد حالت میں زمین پر پڑا ہے۔ انہوں نے اس کی اطلاع فوری طور پر کالج انتظامیہ کو بھی دی۔

ایس پی ستیش کمار کے مطابق نامعلوم افراد کے خلاف مقدمہ درج کر لیا گیا ہے اور مجسمہ کی مرمت کرا کر اسے دوبارہ نصب کرا دیا گیا ہے۔