مودی کی کشتی ڈوبتی دیکھ آر ایس ایس نے بھی ساتھ چھوڑا: مایاوتی

لکھنؤ: بہوجن سماج پارٹی (بی ایس پی) کی سربراہ مایاوتی نے منگل کو دعوی کیا کہ لوک سبھا انتخابات میں بھارتیہ جنتا پارٹی کی کشتی ڈوب رہی ہے اور راشٹریہ سویم سیوک سنگھ (آر ایس ایس) نے بھی اس کا ساتھ چھوڑ دیا ہے۔

مایاوتی نے یہاں پریس کانفرنس میں کہا کہ لوک سبھا انتخابات میں وزیر اعظم نریندر مودی کی کشتی ڈوب رہی ہے۔ اس کا جیتا جاگتا ثبوت ہے کہ آر ایس ایس نے بی جے پی کا ساتھ چھوڑ دیا ہے۔ انہوں نے کہا کہ بی جے پی کی وعدہ خلافی سے آر ایس ایس اور عوام ناراض ہیں اور ہار سے بی جے پی بوکھلا گئی ہے۔

بی ایس پی سربراہ نے کہا کہ انتخابی مہم کے دوران وزیر اعظم کا دوہرا کردار اجاگر ہوا ہے اور بی جے پی کارکنوں میں مایوسی ہے۔ ملک کو صاف شبیہ کا وزیر اعظم چاہیے۔ انہوں نے الیکشن کمیشن سےانتخابی تشہر کے لئے کیے جانے والے روڈ شو کے اخراجات امیدواروں کے اخراجات میں شامل کرنے اور مندروں میں پوجا کا استعمال انتخابی تشہیر کے لئے کرنے پر روک لگانے کا مطالبہ کیا۔

مایاوتی نے ان لوگوں کو نشانہ بنایا جن پر الیکشن کمیشن کچھ وقت کے لئے تشہیر پر روک لگاتا ہے اور وہ تشہیر تو نہیں کرتے لیکن مندروں میں پوجا-پاٹھ کرنا شروع کر دیتے ہیں۔ مایاوتی نے کہا کہ ایسے لوگوں کے مندروں میں جانے کو بڑے پیمانے پر میڈیا میں کور کیا جاتا ہے، جس پر روک لگنی چاہیے، اس پر الیکشن کمیشن کو اقدام اٹھانا چاہیے۔

مایاوتی نے کہا، ’’روڈ شو اور جگہ جگہ پوجا-پاٹھ کرنا ایک نیا چناوی فیشن بن گیا ہے، جس پر بھاری خرچ کیا جاتا ہے۔ الیکشن کمیشن کی طرف سے اس خرچ کو امیدوار کے خرچ میں شامل کرنا چاہیے اور اگر کسی پارٹی امیدوار کے حق میں روڈ شو وغیرہ کیا جاتا ہے تو اسے بھی پارٹی کے خرچ میں شامل کرنا چاہیے۔‘‘

(یو این آئی ان پٹ کے ساتھ)