مدھیہ پردیش کے کسانوں کے ساتھ بھی مذاق

نئی دہلی : بی جے پی حکومتوں نے لاپرواہیوں کے سارے ریکارڈ توڑ کر رکھ دئیے ہیں۔ کسانوں کے معاملہ میں بی جے پی کس قدر بے حس ہو چکی ہے اس کا اندازہ کسانوں کے معاملہ میں بخوبی لگایا جا سکتا ہے۔ حال ہی میں اتر پردیش کی یوگی حکومت نے کسانوں کا صرف چند پیسوں کا قرض معاف کر کے ان کا مذاق اڑایا اور اب مرکزی حکومت نے (وزیر اعظم فصل بیمہ منصوبہ) یہی کارنامہ مدھیہ پردیش میں انجام دیا ہے اور فصل بیمہ کے تحت ان کے پریمیم کی ایک یا دو فیصد رقم لوٹا کر اپنی بے حسی کا ثبوت دیا ہے۔

معاملہ مدھیہ پردیش کے ضلع سیہور کا ہے جہاں فروری 2016 میں وزیر اعظم نریندر مودی نے ’’وزیر اعظم فصل بیمہ منصوبہ‘‘ کی شروعات کی تھی۔ جن کسانوں کو یہ معاضہ فراہم کیا گیا ہے ان میں سے کئی کسان ایسے ہیں جنہوں نے اس تقریب میں حصہ بھی لیا تھا۔ ضلع سیہور کا بدھنی حلقہ انتخاب وزیر اعلیٰ شیو راج چوہان سے وابستہ ہے ، وہ یہیں سے جیت کر وزیر اعلیٰ کی کرسی پر پہنچے ہیں ۔

ضلع سیہور میں سویابین کی فصل تباہ ہو جانے پر 50 کسانوں کو کل 3061.50 روپے معاوضہ کے طور پر دئیے گئے ہیں۔ یہ سبھی کسان ضلع کے تلاڑیا گاؤں کے رہائشی ہیں۔ رپورٹ کے مطابق ان کسانوں کو ’وزیر اعظم فصل بیمہ منصوبہ‘ کی سند بھی جاری کی گئی ہے جس پر وزیر اعلیٰ شیو راج سنگھ چوہان اور وزیر اعظم نریندر مودی کی تصویر لگی ہوئی ہیں۔ ان کسانوں میں سب سے زیادہ معاوضہ 194.24 روپے نیلا بائی نامی کسان کو حاصل ہوا ہے۔ یہ معاوضہ 22 ایکڑ میں لگائی گئی سویابین کی فصل تباہ ہونے پر دیا گیا ہے۔ رپورٹ میں نیلا بائی کے حوالے سے لکھا گیا ہےکہ’’ ہم نے وزیر اعظم فصل بیمہ منصوبہ کے تحت 5220 روپے پریمیم بھرا تھا اور ہمیں معاوضہ کے طور پر محض 194 روپے دئیے گئے ہیں۔بھگوان جانے ان لوگوں نے یہ تخمینہ کس بنیاد پر لگایا ہے۔ ‘‘

وہیں اتم سنگھ کی دو ایکڑ فصل خراب ہوئی ہے جس کے لئے انہیں 17 روپےکلیم کے طور پر دئیے گئے ہیں جبکہ انہوں نے پریمیم کے طور پر 1342 روپے جمع کرائے تھے۔ اسی طرح رہتی تحصیل کی بادامی دیوی کو معاضہ کے طور پر محض 4.70 روپے فراہم کئے گئے ہیں۔

واضح رہے کہ بی جے پی حکومتوں کا کسانوں کے ساتھ مذاق کرنے کا یہ پہلا موقع نہیں ہے۔ اس سے پہلے اتر پردیش کی یوگی حکومت نے بھی متعدد اسناد جاری کی ہیں جن میں کسانوں کے ’’کچھ پیسے ‘‘ کا قرض معاف کیا گیا ہے۔ متھرا کے ایک کسان کا تو ’’ایک پیسہ ‘‘ معاف کیا گیا ہے اور اس کے لئے بھی باقائدہ ایک سند جاری کی گئی ہے۔ جس کسان کا ایک پیسہ معاف کیا گیا ہے اس پر 1.55 لاکھ روپے کا قرض ہے جبکہ یوگی حکومت نے کسانوں سے ایک لاکھ روپے تک کے قرض کو معاف کرنے کا وعدہ کیا تھا ۔

حال ہی میں آندھر پردیش کے کسانوں نے ان کے ساتھ ہو رہے مذاق پر احتجاج درج کرانے کے لئے ایک منفرد طریقہ اختیار کیا۔کسانوں نے وزیر اعظم مودی کو ان کی سالگرہ کے موقع پ68 پیسے کے چیک بھیج کراپنا احتجاج درج کرایا۔ دراصل اندھرا پردیش کے کسانوں کو بھی 10-20 روپے کے چیک راحت کے نام پر تقسیم کئے گئے تھے۔ نریندر مودی کے پاس چیک بھیجنے والے کسانوں کا کہنا تھا کہ شاید ان چیکوں کو دیکھ کر وزیر اعظم کو ہماری حالت زار پر کچھ ترس آئے اور وہ راحت بھرا کوئی قدم اٹھائیں۔