کشمیر: بارہمولہ تصادم میں ایک اور ملی ٹنٹ ہلاک، مہلوکین کی مجموعی تعداد 8 ہو گئی

سری نگر: شمالی کشمیر کے ضلع بارہمولہ کے کریری میں پیر کو ملی ٹنٹوں کے سکیورٹی فورسز کی مشترکہ پارٹی پر حملے کے بعد طرفین کے درمیان چھڑنے والے مسلح تصادم میں منگل کو ایک اور ملی ٹنٹ مارا گیا جس کے ساتھ مہلوک ملی ٹنٹوں کی تعداد بڑھ کر تین ہوگئی ہے۔

پیر کو ملی ٹنٹوں کے حملے اور اس کے بعد علاقے میں چھڑنے والے تصادم میں پانچ سکیورٹی فورسز اہلکاروں اور دو ملی ٹنٹوں سمیت سات افراد مارے گئے تھے۔ مہلوک سکیورٹی فورسز اہلکاروں میں سی آر پی ایف اور فوج کے دو دو اہلکار اور جموں و کشمیر پولیس کا ایک ایس پی او شامل ہیں۔

کشمیر زون پولیس نے کریری تصادم میں ایک اور ملی ٹنٹ کے مارے جانے کی تصدیق کی ہے۔ اس سلسلے میں ایک ٹوئٹ میں کہا گیا کہ 'کریری انکوائنٹر اپڈیٹ میں ایک اور ملی ٹنٹ مارا گیا۔ مہلوک ملی ٹنٹوں کی تعداد بڑھ کر تین ہوگئی ہے۔ ممنوعہ مواد بشمول اسلحہ و گولہ بارود برآمد کیا گیا ہے اور تلاشی آپریشن جاری ہے'۔

فوج کی طرف سے جاری ایک مختصر بیان میں کہا گیا کہ 'بارہمولہ میں ایک اور ملی ٹنٹ مارا گیا جس کے ساتھ مہلوک ملی ٹنٹوں کی تعداد تین ہوگئی۔ ان کے قبضے سے ایک اے کے رائفل اور تین پستولیں برآمد کیے گئے ہیں۔ دو شدید زخمی فوجی جوان زخموں کی تاب نہ لاتے ہوئے دم توڑ گئے ہیں۔ مشترکہ آپریشن جاری ہے'۔ سرکاری ذرائع نے بتایا کہ پیر کو حملے کے بعد شروع ہونے والے ملی ٹنٹ مخالف آپریشن میں منگل کو ایک اور ملی ٹنٹ مارا گیا۔ انہوں نے کہا کہ مذکورہ ملی ٹنٹ جو بظاہر غیر ملکی ہے، کو مارنے کے لئے اس کے خفیہ ٹھکانے کو آئی ای ڈی سے اڑایا گیا۔

پولیس نے پیر کے روز مارے گئے ملی ٹنٹوں کی شناخت لشکر طبینہ کمانڈر برائے شمالی کشمیر سجاد احمد میر عرف حیدر عرف راجا ساکنہ براٹھ کلان سوپور اور اسی تنظیم کے دوسرے ایک ملی ٹنٹ عنایت اللہ میر ساکنہ اندرگام پٹن کے بطور کی تھی۔ ملی ٹنٹوں کے حملے میں جاں بحق ہونے والے سی آر پی ایف اہلکاروں کی شناخت کانسٹیبل لوکیش شرما اور کانسٹیبل خورشید خان ساکنان بہار اور ایس پی او کی شناخت مظفر علی ساکنہ بارہمولہ کے بطور کی گئی تھی۔