ایگزٹ پول پر کمل ناتھ کا طنز، کہا ’یہ تو منورجن پول ہے، پول تو 23 مئی کو کھلے گی‘

مدھیہ پردیش کے وزیر اعلیٰ کمل ناتھ نے ایگزٹ پول پر سوال کھڑے کرتے ہوئے کہا ہے کہ ’’یہ ایگزٹ پول نہیں، منورنجن پول ہے۔ پول (قلعی) تو 23 مئی کو کھلے گی۔‘‘ دراصل اتوار کو ساتویں مرحلہ کی ووٹنگ کے بعد کئی نیوز چینلز کے ایگزٹ پول سامنے آئے۔ ان میں سے بیشتر میں بی جے پی کے حق میں رجحان دکھایا گیا ہے۔ کمل ناتھ نے منگل کو ایگزٹ پول پر نامہ نگاروں کے سوالوں کا جواب دیتے ہوئے کہا کہ ’’سوشل میڈیا پر بہت سی ایسی جانکاریاں آ رہی ہیں، لیکن یہ ایگزٹ پول نہیں منورنجن پول ہے۔‘‘

کمل ناتھ نے بی جے پی پر طنز کستے ہوئے یہ بھی کہا کہ ’’ایگزٹ پول کی جو روایت بنائی گئی ہے ان کے رجحانات پر ہی جشن منا لو۔ سچائی 23 تاریخ کو سامنے آئے گی۔ سوشل میڈیا پر ای وی ایم کا ایک نیا گھوٹالہ سامنے آ رہا ہے۔ وہ کتنا صحیح ہے اور کتنا صحیح نہیں، وہ 23 مئی کو سامنے آ جائے گا۔‘‘

واضح رہے کہ ایگزٹ پول پر سابق بی جے پی لیڈر اور نائب صدر جمہوریہ ونکیا نائیڈو بھی سوال اٹھا چکے ہیں۔ ان کا کہنا تھا کہ ایگزٹ پول کے نتائج اکثر غلط ثابت ہوتے ہیں۔ اس لیے ایگزٹ پول پر بھروسہ نہیں کیا جا سکتا۔

ونکیا نائیڈو نے ایگزٹ پول کو مسترد کرتے ہوئے اس کی تاریخ پر بھی سوال اٹھائے تھے۔ ونکیا نائیڈو نے کہا تھا کہ 1999 کے بعد سے جتنے ایگزٹ پول ہوئے ہیں وہ زیادہ تر غلط ہی ثابت ہوئے ہیں۔ ان کا کہنا تھا کہ نتیجہ آنے سے پہلے سبھی امیدوار اپنے آپ کو جیتا ہوا ہی مانتے ہیں۔