عصمت دری کے مجرم آسارام کو عمر قید کی سزا

جودھپور کی عدالت نے آسارام کو نابالغ لڑکی سے عصمت دری کرنے کا مجرم قرار دیا اور سزا کا بھی اعلان کر دیا۔ آسارام کو عمر قید کی سزا سنائی گئی ہے۔ آسارام کے ساتھ دوسرے شریک جرم شلپی اور شرت چندر کو بھی عدالت نے مجرم قرار دیا ہے اور انہیں 20-20 سال کی سزا سنائی گئی ہے۔ دو اور ملزمان خدمت گار شیوا اور باورچی پرکاش کو کورٹ نے بری کر دیا ہے۔

میڈیا رپورٹوں کے مطابق جیسے ہی آسارام کی سزا کا اعلان ہوا وہ عدالت میں ہی زار و قطار رونے لگا۔ ادھر آسارام کے آشرم کی ترجمان نیلم دوبے نے کہا کہ ’’ہم عدالت کے فیصلے کے خلاف عدالت عالیہ سے رجوع کریں گے۔‘‘

آسارام کو جودھپور کی ایس سی، ایس ٹی عدالت نے مجرم قرار دے دیا ہے، انہیں کتنی سزا ملے گی اس پر بحث جاری ہے۔ تصور کیا جا رہا ہے کہ کہ آسارام کو کم از کم 10 سال کی سزا سنائی جا سکتی ہے۔ عدالت میں آسارام سمیت تین ملزمان کو سزا دینے سے پہلے وکلاء کی بحث جاری ہے۔ عمر کا حوالہ دے کر آسارام کے وکلاء نے کم سزا دینے کا مطالبہ کیا ہے۔ متاثرہ کی طرف سے معاوضہ کی درخواست داخل کی گئی ہے۔ آسارام کی طرف سے 14 وکلاء بحث کر رہے ہیں۔

عدالت نے گینگ بنا کر آبروریزی کرنے کے 376 ڈی کے معاملہ میں آسا رام کے چار خدمت گذاروں میں سے شرت چندر، شلپی کو بھی مجرم مانا ہے جبکہ پرکاش اور شیوا کو آزاد کر دیا۔ان میں سے پرکاش کو چھوڑ کرباقی تمام ضمانت پر تھے۔ پرکاش نے جیل میں آسا رام کی خدمت کرنے کے لیے ضمانت نہیں لی تھی۔ عدالت کے فیصلے کے دوران سرخ ٹوپی پہنے آسارام اپنے معروف سفید کپڑے میں اپنی قسمت کا فیصلہ سننے کے لئے موجود تھے۔

شہر میں نظم و نسق برقرار رکھنے کیلئے جودھپور اور خاص کر جیل کے باہر بڑی تعداد میں پولس فورس موجود تھی۔ آسارام کے آشرم کو کل ہی خالی کرا لیا گیا تھا اور باہر سے آنے والوں پر سخت نگرانی رکھی جا رہی تھی۔ سخت نگرانی کی وجہ سے ہی آج گجرات سے آئے آسارام کے دس بھکت پولس سے نہیں بچ سکے۔ ان میں سے ایک بھکت مالا لے کر جیل کے مین گیٹ تک پہنچ گیا تھا۔

اگست 2013 سے جاری مقدمے میں متاثرہ لڑکی اپنے بیان سے نہیں ڈگمگائی۔ اس معاملہ میں استغاثہ کی حمایت میں بیان دینے والے کرپال سنگھ کو مار ڈالا گیا۔ اس دوران بہت سے گواہوں کو اغوا کرکے قتل کرنے کے الزام بھی لگائے گئے۔

آسارام کو عدالت کی طرف سے مجرم قرار دئیے جانے پر متاثرہ کے والد نے اطمینان کا اظہار کیا ہے۔ انہوں نے کہا ’’آسارام مجرم ہیں، ہمیں انصاف ملا ہے۔ ہمیں امید ہے کہ اسے سخت سزا دی جائے گی۔ مجھے یہ بھی امید ہے کہ جن گواہوں کو قتل کیا گیا یا اغوا کیا گیا انہیں بھی انصاف ملے گا۔‘‘

کانگریس کے سینئر رہنما اشوک گہلوت نے آسارام کو مجرم قرار دینے پر رد عمل ظاہر کرتے ہوئے کہا، ’’اس معاملہ سے بین الاقوامی سطح پر ملک کی کافی بدنامی ہوئی ہے، اس لئے اب وقت آ گیا ہے کہ لوگ حقیقی سنتوں اور دھوکہ بازوں میں فرق کو سمجھیں۔‘‘

عصمت دری کے معاملہ میں آسارام سمیت 3 افراد کو مجرم قرار دیا گیا ہے جبکہ دو ملزما ن کو عدالت نے بری کر دیا۔ یہ فیصلہ جودھپور کی ایس سی-ایس ٹی عدالت نے سنایا ہے۔ نابالغ لڑکی سے عصمت دری کے معاملہ میں عدالت نے آسارام کے ساتھ شلپی گپتا عرف سنچیتا گپتا، شرت چندر، شیوا عرف سیوارام اور باورچی پرکاش دویدی کو ملزم بنایا گیا تھا۔ اس فیصلے پر ملک بھر کی نگاہیں لگی ہوئی تھیں اور آسارام کے مرید کل سے ہی ان کے حق میں مہم چلا رہے ہیں اور پوچا ارچنا بھی کر رہے ہیں۔

معاملہ میں یہ چار افراد معاون ملزمان تھے:

• ہاسٹل وارڈن شلپی عرف سنچیتا گپتا نے بھوت پریت سے خوف زدہ کر کے طالبہ کو غلط نیت سے آسارام کے پاس بھیجا۔
• ہاسٹل نگراں شرت چندر متاثرہ کی بیماری معلوم ہونے پر بھی اس کا علاج نہیں کرایا۔ پوری رات تنتر منتر کے ذریعہ آسارام کو ہی واحد علاج کرنے والا تصور کرنے پر مجبور کیا۔
• اہم خدمت گار شیوا عرف سیوارام پر الزام تھا کہ متاثرہ کو شاہجہانپور سے دہلی اور دہلی سے جودھپور بلایا۔ جودھپور کے منائی آشرم میں آسارام کے ملنے کا انتظام کیا گیا۔
• باورچی پرکاش دویدی پر شرت چندر، شلپی، شیوا اور آسارام کے بیچ مفاہمت کرنے کا الزام تھا۔ اس پر یہ بھی الزام تھا کہ اس نے متاثرہ کے گھر والوں کو بھیج کر طالبہ کو اکیلی رہنے کے لئے صورت حال پیدا کی۔

عدالت نے شیوا اور باورچی پرکاش کو بری کر دیا ہے۔

آسارام کی ترجمان نیل دوبے نے آسارام کو مجرم قرار دینے پر ردعمل ظاہر کرتے ہوئے کیا ’’ہم اپنی لیگل ٹیم سے بات کریں گے اس کے بعد آگے کی حکمت عملی طے کی جائے گی۔ ہمیں عدلیہ پر پورا یقین ہے۔‘‘

نابالغ لڑکی سے عصمت دری کے معاملہ میں آسارام پر فیصلہ سنائے جانے سے قبل اس معاملہ میں اہم گواہ مہیندر چاولا نے کہا کہ ’’مجھے عدلیہ پر پورا یقین ہے کہ آسارام کو مجرم قرار دیا جائے گا۔‘‘ انہوں نے کہ ’’میں نے عدالت سے یہ مطالبہ کیا ہے کہ اس طرح کے زانیوں کو پھانسی کی سزا دی جانی چاہئے۔‘‘ مہیندر چاولا نے مزید کہا ’’میری جان کو خطرہ ہے۔ میں نے مرکزی حکومت سے اضافی سیکورٹی کا مطالبہ کیا ہے۔ میری طرح دوسرے گواہوں کو بھی جان کا خطرہ ہے۔‘‘

نابالغ لڑکی سے ریپ کے الزام میں فیصلہ تھوڑی دیر میں سنایا جائے گا۔ اسی بیچ آسارام کے آشرم کی طرف سے مریدوں سے اپیل کی گئی ہے کہ وہ امن بنائے رکھیں۔

راجستھان کی جودھپور جیل میں بند آسا رام کے خلاف عصمت دری کے معاملے میں فیصلہ کچھ ہی دیر میں ہونے والا ہے۔ سیکورٹی کے پیش نظر فیصلہ جودھپور جیل احاطہ کے اندر ہی سنایا جائے گا اور فیصلہ سنانے کے لئے جج جودھپور کی سنٹرل جیل پہنچ چکے ہیں۔

آسارام سے متعلق فیصلہ سنائے جانے کے پیش نظر شہر میں قانون و انتظام کی حالت بگڑنے کے اندیشہ کو دیکھتے ہوئے جودھپور میں 30 اپریل تک دفعہ 144 نافذ کر دی گئی ہے۔ جودھپور میں کسی بھی عوامی مقام پر 4 سے زائد لوگ جمع نہیں ہو سکتے۔ پورے شہر کو پولس نے چھاؤنی میں تبدیل کر دیا ہے۔ شہر کے ہر اہم چوک اور چوراہوں پر پولس فورس کو تعینات کیا گیا ہے۔ وزارت داخلہ نے احتیاطی قدم اٹھاتے ہوئے تین ریاستوں کو الرٹ بھی جاری کر دیا ہے۔ جن ریاستوں کو الرٹ جاری کیا گیا ہے ان کے نام راجستھان، گجرات اور ہریانہ ہیں۔ اس درمیان شاہجہاں پور میں عصمت دری متاثرہ کے گھر کے باہر بھی سیکورٹی کے سخت انتظامات کیے گئے ہیں۔

آسارام ایک نابالغ لڑکی سے عصمت دری اور ایس سی-ایس ٹی ایکٹ کی خلاف ورزی کے الزام میں 31 اگست 2013 سے جودھپور کی جیل میں بند ہیں۔ اس معاملے میں اگر وہ قصوروار پائے جاتے ہیں تو انہیں زیادہ سے زیادہ 10 سال جیل کی سزا ہو سکتی ہے۔

اس درمیان فیصلے کے بعد کسی بھی ناخوشگوار واقعہ کے اندیشہ کو دیکھتے ہوئے ضلع انتظامیہ نے متاثرہ اور اس کے گھر کے آس پاس سیکورٹی انتظامات سخت کر دیے ہیں۔ 5 پولس اہلکار کو 24 گھنٹے متاثرہ کے گھر پر تعینات کیا گیا ہے جو ہر آنے جانے والوں پر سخت نظر رکھے ہوئے ہیں۔ پولس نے بتایا ہے کہ کسی بھی مشکل حالات سے نمٹنے کے لیے ریزرو فورس تیار ہے۔