جموں: جمبو چڑیا گھر کا پہلا مرحلہ 2021 کے آخر تک مکمل ہوگا

جموں: جموں شہر کے مضافاتی علاقہ نگروٹہ میں قومی شاہراہ پر 121 کروڑ روپے کی لاگت سے تیار ہونے والے جمبو چڑیا گھر پروجیکٹ کے پہلے مرحلے کو سال رواں کے ماہ دسمبر تک مکمل کیا جائے گا۔ محکمہ جنگلات جموں و کشمیر کی طرف سے تیار ہونے والا یہ چڑیا گھر نگروٹہ کے خانپور میں 227 ایکٹر اراضی پر تیار کیا جا رہا ہے۔

ایڈینشل وارڈن وائلڈ لائف امت شرما نے یو این آئی کو بتایا کہ جمبو چڑیا گھر کے کام کا پہلا مرحلہ سال رواں کے ماہ دسمبر تک مکمل کیا جائے گا اور اس کے دوسرے مرحلے میں ’جنگل سفاری‘ کو متعارف کیا جائے گا۔ انہوں نے کہا کہ چڑیا گھر کا پہلا مرحلہ 62 کروڑ 41 لاکھ روپے کی لاگت سے تیار ہو رہا ہے۔ موصوف وائلڈ لائف عہدیدار نے کہا کہ اس چڑیا گھر میں باقی جانوروں کے علاوہ بلیک بیک لوگوں کی توجہ کا مرکز ہوگا۔

ایک دیگر عہدیدار نے کہا کہ اس چڑیا گھر میں دلی سے بلیک بیک لائے جائیں گے جس کے لئے مرکزی چڑیا گھر حکام نے منظوری دے دی ہے۔ انہوں نے کہا کہ گجرات، اڑیسہ، مدھیہ پردیش، ہریانہ اور اتر پردیش جیسی ریاستوں سے شیر، چیتے، ریچھ، مگر مچھ وغیرہ جیسے جانور لائے جائیں گے۔ ان کا کہنا تھا کہ جمبو چڑیا گھر شمالی بھارت کا سب سے بڑا چڑیا گھر ہوگا، جس میں دیگر سہولیات کے علاوہ بچوں کے لئے پارک، بیٹری پر چلنے والی کاریں اور سائیکل دستیاب ہوں گے۔ انہوں نے مزید کہا کہ اس چڑیا گھر سے جموں میں سیاحتی شعبے کو مزید فروغ ملے گا۔