حیدرآباد: این ایس یو آئی کا شراب خانوں کے خلاف احتجاج، متعدد کارکنان گرفتار

حیدرآباد: کانگریس کی طلبہ تنظیم این ایس یو آئی کے کارکنوں نے شہر حیدرآباد کے جوبلی ہلز کے ایک پب (شراب خانہ) کا محاصرہ کیا اور پبس میں رات دیر گئے تک نابالغ لڑکے لڑکیوں کے داخل ہونے پر شدید ناراضگی کا اظہار کیا۔ دریں اثنا، وہاں موجود پولیس نے یوتھ کانگریس کے کارکنوں کو گرفتار کرتے ہوئے پولیس اسٹیشن منتقل کر دیا۔

اس موقع پر یوتھ کانگریس کارکنوں نے نعرے بازی بھی کی۔ یوتھ کانگریس کارکنوں نے کل شب ضلع رنگاریڈی کے شمس آباد میں واقع دو پبس کا بی وینکٹ کی قیادت میں محاصرہ کیا تھا۔ این این یو آئی کا الزام ہے کہ شہر حیدرآباد میں حالیہ دنوں کے دوران پبس میں مخرب اخلاق ڈانس اور پبس میں آنے والوں کی غیر اخلاقی حرکات ریپ کلچر کو فروغ دے رہی ہیں۔

این ایس یو آئی کارکنان نے شمس آباد ایئرپورٹ کے قریب واقع پبس کو رات دیر گئے تک کھلا رکھنے پر اعتراض ظاہر کرتے ہوئے انہیں فوری طور پر بند کرنے کامطالبہ کیا۔ وینکٹ نے کہا کہ پبس میں شراب نوشی کی جاتی ہے اور اس کی وجہ سے عصمت دری کے واقعات پیش آ رہے ہیں۔ انہوں نے الزام لگایا کہ ان پبس کی جانب سے قواعد کی خلاف ورزی کی جا رہی ہے۔

انہوں نے چندرشیکھرراو زیر قیادت حکومت سے مطالبہ کیا کہ ان پبس کو فوری طور پر بند کرنے کے اقدامات کئے جائیں۔ اس موقع پر پبس کے ذمہ داروں اور وینکٹ کے درمیان بحث و تکرار بھی ہوئی۔ مظاہرین نے کہا کہ ان پبس میں آنے والوں کے لئے عمر کی بھی کوئی حد مقررنہیں کی گئی ہے۔ انہوں نے کہا کہ کئی افراد شراب نوشی کرنے کے بعد ان پبس میں آ رہے ہیں اور ان پبس کو صبح تقریباً پانچ بجے تک کھلے رکھنے کی اجازت دی جا رہی ہے جو افسوسناک ہے۔ انہوں نے ساتھ ہی انتباہ دیا کہ اگر ان پبس کے خلاف کارروائی نہیں کی گئی تو اندرون تین دن احتجاج میں شدت لائی جائے گی۔