ہیڈ کانسٹیبل میں کورونا کی تصدیق کے بعد بی ایس ایف ہیڈکوارٹر کی پہلی-دوسری منزل سیل

نئی دہلی: بارڈر سیکورٹی فورس (بی ایس ایف) کے ہیڈکوارٹر میں کام کرنے والے ایک ہیڈ کانسٹیبل میں کورونا کی تصدیق ہونے کے بعد سی جی او کمپلیکس واقع اس عمارت کی پہلی اور دوسری منزل کو سیل کر کے جراثیم کش ادویات کا چھڑکاؤ کیا جا رہا ہے۔

بی ایس ایف کے آج جاری ایک بیان میں کہا گیا ہے کہ فورس کے ہیڈ کوارٹر میں کام کرنے والا ایک ہیڈ کانسٹیبل اتوار کو کورونا متاثر پایا گیا۔ وہ عمارت کی دوسری منزل پر کام کرتا ہے اور آخری مرتبہ ایک مئی یعنی جمعہ کو دفتر آیا تھا۔ اس کے رابطہ میں آنے والے سبھی لوگوں کی پہچان کرکے انہیں کوارنٹائین کردیا گیا ہے۔ ان تمام کی کورونا جانچ بھی کی جائے گی۔ فورس نے احتیاط کے طورپر آٹھ منزلہ عمارت کی پہلی اور دوسری منزل کو سیل کردیا ہے وہاں جراثیم کش ادویات کا چھڑکاؤ کیا جا رہا ہے۔

بی ایس ایف نے اس معاملے کی خبر سے قبل خصوصی احتیاطی اقدام کے تحت دفتر کو جمعہ شام چار بجے ہی مقررہ وقت سے پہلے بند کر دیا تھا۔ سبھی ملازمین کے جانے کے بعد تمام دفاتر کو انفکشن سے پاک کیا گیا تھا۔ ہفتہ اور اتوار کو دفتر بند تھ، اس دوران دفتر میں صرف سیکورٹی اہلکار اور کنٹرول روم کا عملہ ہی موجود تھا۔ ہیڈ کانسٹیبل میں انفکشن کی تصدیق اتوار کی شب کو ہوئی تھی۔

اس معاملے کے منظر عام پر آنے کے بعد پوری عمارت کو دوبارہ انفکشن فری کرنے کا فیصلہ کیا گیا۔ پروٹوکال کے مطابق متاثرہ شخص کے سیکینڈ اور تھرڈ کنٹکٹ کا بھی پتا لگایا جا رہا ہے۔ فورس کے 42 جوان پہلے سے ہی کورونا متاثر ہیں اور اب یہ تعداد 43 ہوگئی ہے۔ ان میں 32 جوان دہلی پولیس کے ساتھ جامع مسجد اور چاندنی محل علاقے میں تعینات تھے۔