بڑی خبر: تمل ناڈو کے مشہور لیڈر کروناندھی کا انتقال، آخری رسومات کل شام

جموں و کشمیر کے سابق وزیر اعلیٰ فاروق عبداللہ نے کروناندھی کے انتقال پر اظہارِ غم کرتے ہوئے کہا ہے کہ ’’ہمارے درمیان سے ایک عظیم لیڈر چلا گیا۔ وہ صرف تمل ناڈو کی نمائندگی نہیں کرتے تھے بلکہ پورے ہندوستان کی نمائندگی کرتے تھے۔‘‘ کروناندھی کے آخری رسومات کے لیے تمل ناڈو حکومت کے ذریعہ مرینا بیچ پر جگہ نہیں دیے جانے سے متعلق فاروق عبداللہ نے کہا کہ ’’اگر ڈی ایم کے کی خواہش کے مطابق جگہ تمل ناڈو حکومت نے آخری رسومات کی ادائیگی کے لیے نہیں دی تو تمل ناڈو کی عوام ریاستی حکومت کو کبھی معاف نہیں کرے گی۔‘‘

8 اگست کو قومی پرچم جھکا ہوا رہے گا اور اسے نصف اونچائی پر رکھا جائے گا۔ ایسا دہلی اور سبھی ریاستوں کی راجدھانی میں کرنے کا فیصلہ لیا گیا ہے۔ علاوہ ازیں تمل ناڈو میں ہر جگہ قومی پرچم نصف اونچائی پر رکھنے کا اعلان کیا گیا ہے۔ ساتھ ہی یہ بھی فیصلہ لیا گیا ہے کہ کل چنئی میں کروناندھی کی آخری رسومات ریاستی سطح پر ادا کی جائے گی اور پورے ملک میں 8 اگست کو غم منایا جائے گا۔ یہ اعلان حکومت ہند کی طرف سے کیا گیا ہے۔

دوسری طرف حکومت ہند کے اعلان سے پہلے ہی کرناٹک حکومت نے 8 اگست کو قومی غم یعنی قومی سوگ منانے کا اعلان کر دیا تھا۔ تمل ناڈو میں یہ سوگ ایک ہفتہ منائے جانے کا اعلان تمل ناڈو حکومت نے بھی کروناندھی کے انتقال کے کچھ ہی گھنٹوں بعد کر دیا تھا۔

کروناندھی کے آخری رسومات پر تنازعہ شروع ہو گیا ہے۔ دراصل ڈی ایم کے کارکنان چاہتے ہیں کہ ان کے آخری رسومات مرینا بیچ پر ہوں جب کہ تمل ناڈو حکومت نے وہاں جگہ دینے سے انکار کر دیا ہے۔ اس کے خلاف مدراس ہائی کورٹ میں شکایت کی گئی ہے۔ مدراس ہائی کورٹ کے کارگزار جج چیف جسٹس ہلواڈی جی رمیش نے اس سلسلے میں آج 10.30 بجے شب سماعت کرنے پر رضامندی ظاہر کر دی ہے۔

ڈی ایم کے کارکنان کی زبردست بھیڑ کے درمیان کاویری اسپتال سے ایم کروناندھی کی جسد خاکی ان کی رہائش گوپالا پورم کے لیے روانہ ہو چکی ہے۔ قابل ذکر ہے کہ ان کی آخری رسومات کل شام ادا کی جائیں گی۔ ملک بھر سے کئی اہم سیاسی لیڈران ان رسومات میں شرکت کے لیے کل چنئی کے لیے روانہ ہونے والے ہیں۔

چنئی میں کاویری اسپتال کے باہر ڈی ایم کے کارکنان کی زبردست ہنگامہ آرائی شروع ہو گئی ہے۔ دراصل پارٹی کارکنان کو جیسے ہی پتہ چلا کہ تمل ناڈو حکومت نے کروناندھی کی سمادھی بنانے کے لیے مرینا بیچ پر جگہ دینے سے انکار کر دیا ہے، ان کا غصہ بڑھ گیا۔ ذرائع کے مطابق حالات قابو میں کرنے کے لیے پولس ڈپارٹمنٹ نے سپاہیوں کو لاٹھی چارج کی اجازت دے دی گئی ہے۔

دوسری طرف کانگریس کے سینئر لیڈر غلام نبی آزاد نے کروناندھی کی سمادھی پر سیاست کیے جانے کو غلط ٹھہرایا ہے۔ انھوں نے کہا مرینا بیچ پر کروناندھی کو جگہ ملنی چاہیے اور اس پر کسی بھی طرح کی سیاست نہیں کی جانی چاہیے۔

ڈی ایم کے لیڈر دورئی مُرگن نے میڈیا سے بات چیت کے دوران کہا کہ ہم نے وزیر اعلیٰ سے ملاقات کی اور ان سے گزارش کی تھی کہ ان کی سمادھی اَنّا میموریل کے نزدیک بنائی جائے۔ انھوں نے ہماری گزارش مان لی ہے۔ لیکن ابھی تک اس بات کی باضابطہ جانکاری عام نہیں کی گئی ہے۔

کل شام کروناندھی کی آخری رسومات ادا کی جائیں گی جس میں شریک ہونے کے لیے ملک بھر سے کئی سیاسی لیڈران چنئی پہنچنے والے ہیں۔ کانگریس صدر راہل گاندھی بھی کانگریس کے سینئر لیڈر غلام نبی آزاد اور مکل واسنک کے ساتھ 8 اگست کو چنئی کے لیے روانہ ہوں گے۔

کروناندھی کے انتقال کے بعد تمل ناڈو کے عوام غم میں ڈوب گئے ہیں۔ کروناندھی کی رہائش پر تو لوگوں کا ہجوم جمع ہے ہی، کاویری اسپتال کے باہر بھی لوگوں کی زبردست بھیڑ جمع ہو گئی ہے۔ کروناندھی کی یاد میں ان کے چاہنے والے لگاتار نعرے لگا رہے ہیں۔ کروناندھی کے بیٹے ایم کے اسٹالن نے اپنے حامیوں سے امن برقرار رکھنے کی اپیل کی ہے لیکن کئی عوام آہ و بقا کر رہے ہیں۔

کروناندھی کے انتقال کے بعد تمل ناڈو میں ایک ہفتہ کے ریاستی غم کا اعلان کر دیا گیا ہے۔ تمل ناڈو کے اسکولوں میں ایک دن کی تعطیل بھی کر دی گئی ہے۔

کانگریس صدر راہل گاندھی نے بھی کروناندھی کے انتقال پر اظہارِ تعزیت پیش کرتے ہوئے سیاست میں ان کے کارناموں کو یاد کیا۔ راہل گاندھی نے ٹوئٹ کرتے ہوئے لکھا ہے کہ ’’تمل عوام انھیں بے پناہ محبت کرتی تھی، کروناندھی نے تمل سیاست کے اسٹیج پر 6 دہائی تک حکمرانی کی۔ ان کے انتقال سے ہندوستان نے ایک عظیم بیٹا کھو دیا۔‘‘

اہم سیاسی لیڈروں کے ذریعہ کروناندھی کے انتقال پر اظہارِ غم کا سلسلہ لگاتار جاری ہے۔ اس درمیان صدر جمہوریہ رام ناتھ کووند، مغربی بنگال کی وزیر اعلیٰ ممتا بنرجی اور دہلی کے وزیر اعلیٰ اروند کیجریوال نے بھی انھیں پرخلوص خراج عقیدت پیش کیا اور ان کے اہل خانہ کے لیے صبر و جمیل کی دعا کی۔

مشہور و معروف اداکار کمل ہاسن نے کروناندھی کے انتقال کو اپنے لیے انتہائی تکلیف دہ بتایا۔ ایک تقریب میں شریک کمل ہاسن نے کہا کہ کروناندھی کو وہ سیاسی لیڈر کی شکل میں جاننے سے پہلے انھیں ایک رائٹر کے طور پر جانتا تھا۔ ساتھ ہی کمل ہاسن نے کہا کہ ہماری زبان کروناندھی کی ہی دین ہے کیونکہ جس زبان کا استعمال ہم اداکاروں نے فلموں میں کیا وہ کروناندھی کی ہی تھی۔

حفاظتی نقطہ نظر سے کروناندھی کے گھر کے باہر ریپڈ ایکشن فورس تعینات کر دیا گیا۔ چونکہ یہاں لوگوں کی زبردست بھیڑ جمع ہو رہی ہے اس لیے کسی طرح کا خطرہ نہ لیتے ہوئے فورس تعینات کرنے کا فیصلہ لیا گیا۔ تازہ اطلاعات کے مطابق کرناٹک ریاستی ٹرانسپورٹ کارپوریشن نے فی الحال تمل ناڈو کے لیے اپنی خدمات کو بھی بند کر دیا ہے۔

کروناندھی کے انتقال کی خبر عام ہونے کے بعد کانگریس نے اپنے ٹوئٹر ہینڈل سے انھیں خراج تحسین پیش کرتے ہوئے ان کے کاموں کو یاد کیا۔ کانگریس نے کروناندھی کو ڈائنامک لیڈر قرار دیا اور کہا کہ وہ جمہوریت کے حقیقی علمبردار تھے۔ کانگریس نے لکھا ہے کہ کروناندھی نے تمل ناڈو اور ملک کے لیے جو کچھ کیا ہے اسے کبھی فراموش نہیں کیا جا سکتا۔

کروناندھی کے انتقال کی خبر ملتے ہی مختلف شعبہ ہائے زندگی سے تعلق رکھنے والی ہستیوں کے خراج عقیدت پیش کرنے کا سلسلہ بھی شروع ہو گیا ہے۔ کانگریس جنرل سکریٹری اشوک گہلوت، کانگریس سینئر لیڈر سی پی جوشی، مشہور و معروف اداکار رجنی کانت اور ہندوستان کے سابق کرکٹر ویریندر سہواگ نے ٹوئٹ کے ذریعہ اپنے غم کا اظہار کیا اور کروناندھی کو پرخلوص خراج عقیدت پیش کیا۔

کروناندھی کی جسد خاکی کو ان کی رہائش گوپال پورم لے جایا جائے گا۔ اس کے بعد عام لوگوں کی زیارت کے لیے ان کی جسد خاکی راجہ جی ہال میں رکھا جائے گا۔ ذرائع کے مطابق کل شام ان کی آخری رسومات ادا کی جائیں گی۔ یہ رسومات چنئی کے مرینا بیچ پر ادا ہوں گی۔

تمل ناڈو کے مشہور و معروف لیڈر اور ڈی ایم کے سربراہ کروناندھی کے انتقال کی خبر ملنے کے بعد وزیر اعظم نریندر مودی نے غم کا اظہار کیا ہے۔ اس موقع پر انھوں نے کروناندھی کے اہل خانہ اور ان کے چاہنے والوں کے غم میں خود کو شریک بتایا۔

ڈی ایم کے سربراہ ایم کروناندھی کا طویل علالت کے بعد آج انتقال ہو گیا۔ انھوں نے اپنی آخری سانس چنئی کے کاویری اسپتال میں لی۔ اس سلسلے میں کاویری اسپتال نے ایک پریس ریلیز جاری کیا جس میں انھوں نے لکھا ہے کہ کروناندھی کا انتقال 7 اگست 2018 کو شام 6.10 بجے ہوا۔

دہلی کی کیجریوال حکومت نے ایک بڑا فیصلہ لیتے ہوئے ایم ایل اے فنڈ 4 کروڑ سے بڑھا کر 10 کروڑ کرنے کا فیصلہ لیا ہے۔ فنڈ میں 6 کروڑ کے اضافے کے بعد امکان ظاہر کیا جا رہا ہے کہ عوام کے لیے ترقیاتی کام میں فنڈ کی وجہ سے اب کوئی رکاوٹ نہیں آئے گی۔ فنڈ بڑھانے کا یہ فیصلہ دہلی کابینہ کی میٹنگ میں لیا گیا اور دہلی کے نائب وزیر اعلیٰ منیش سسودیا نے آج اسمبلی میں اس کی جانکاری دی۔

قابل ذکر ہے کہ کیجریوال حکومت کافی دنوں سے ایم ایل اے فنڈ میں اضافہ کرنے کی کوشش میں تھی لیکن جب نجیب جنگ لیفٹیننٹ گورنر تھے تو انھوں نے کئی بار اس سے متعلق فائل کو واپس لوٹا دیا۔ اب جب کہ سپریم کورٹ نے دہلی حکومت کے اختیارات بڑھا دیے ہیں تو کیجریوال کابینہ نے فوراً ایم ایل اے فنڈ کو بڑھانے کا فیصلہ لےلیا۔

بہار کے مظفرپور میں شیلٹر ہوم میں بچیوں کے ساتھ آبروریزی معاملہ کی سماعت کرتے ہوئے سپریم کورٹ نے حکومت کو سخت پھٹکار لگائی۔ عدالت عظمیٰ نے پوچھا کہ آخر شیلٹر ہوم کو کسنے پھلنے پھلونے دیا۔ سپریم کورٹ نے سوال کیا کہ شیلٹر ہوم کو فنڈ کون دے رہا تھا!

سپریم کورٹ نے قومی جرائم بیورو کا حوالہ دیتے ہوئے کہا کہ ہندوستان میں ہر 6 گھنٹے میں ایک خاتون کے ساتھ عصمت دری ہوتی ہے۔ ریپ کے واقعات پر تشویش کا اظہار کرتے ہوئے سپریم کورٹ نے تبصرہ کیا کہ ہر طرف عصمت دری کے واقعات ہو رہے ہیں۔

شمالی کشمیر کے ضلع بانڈی پورہ میں لائن آف کنٹرول (ایل او سی) کے گریز سیکٹر میں جنگجوؤں کی دراندازی کو ناکام بنانے کے دوران ایک افسر سمیت 4 فوجی اہلکار جاں بحق ہوگئے ہیں۔ فوج کی کاروائی میں 2 جنگجو مارے گئے ہیں۔ فوج کی چنار کور نے اپنے آفیشل ٹویٹر اکاونٹ پر ایک ٹویٹ میں کہا ’گریز سیکٹر میں دراندازی کی کوشش ناکام بنائی گئی ہے۔ دو جنگجو مارے گئے ہیں۔ آپریشن میں ایک افسر اور تین فوجی شہید ہوگئے ہیں۔ آپریشن جاری ہے‘۔

ایک دفاعی ترجمان نے بتایا ’گریز سیکٹر میں منگل کی صبح جنگجوؤں کے ایک گروپ کی دراندازی ناکام بنائی گئی۔ طرفین کے مابین مسلح تصادم ہوا جس میں ہم نے ایک میجر سمیت چار اہلکاروں کو کھو دیا‘۔ مہلوک فوجیوں کی شناخت میجر کے پی رانے، حوالدار جامی سنگھ، حوالدار وکرم جیت اور رائفل مین مندیپ سنگھ کی حیثیت سے کی گئی ہے۔ مہلوک اہلکار فوج کی 36 راشٹریہ رائفلز (آر آر) سے وابستہ تھے۔ دفاعی ترجمان نے مزید بتایا ’آپریشن میں دو جنگجوؤں کو ہلاک کیا گیا ہے۔ آپریشن جاری ہے‘۔

نوئیڈا: گریٹر نوئیڈا کے پچائتن گاؤں میں کانوڑیوں کے دو گروپوں میں شیوراتری کے دن بھنڈارا کرنے اور چندا اکٹھا کرنے کو لے کر خونی تصادم ہو گیا۔ دونوں دھڑوں کی طرف سے جم کر لاٹھی ڈنڈے چلے اور پتھراؤ کیا گیا۔ اس جھگڑے میں دونوں طرف کے تقریباً ایک درجن لوگ زخمی ہوئے ہیں جنہیں علاج کے لئے اسپتال میں بھرتی کرایا گیا ہے۔

تصادم کے دوران کانوڑیوں کے ہاتھوں میں رائفل، لاٹھی، ڈنڈے اور تلوار جیسے ہتھیار نظر آ رہے تھے۔ الزام ہے کہ ایک دھڑے کی طرف سے فائرنگ بھی کی گئی۔ تصادم کے بعد سے گاؤں میں افراتفری کا ماحول ہے۔

یہ بھی پڑھیں: کانوڑیاترا نے اختیار کیا سیاسی رنگ، ڈی جے پرہو رہی یوگی کی تعریف اکھلیش کی برائی

واضح رہے کہ پچائتن گاؤں کے لوگ گروپ بناکر کانوڑ لینے جاتے ہیں۔ اس بار کانوڑ لینے کے لئے دو گروپ چلے گئے، ایک برہم سنگھ کا اور دوسرا مہندر سنگھ کا۔ کانوڑ لینے جانے سے پہلے ایک گروپ بھنڈارے کے لئے چندا اکٹھا کرنے لگا۔ اسی کو لے کر دونوں گروپوں میں مار پیٹ شروع ہو گئی۔

ایس پی گریٹر نوئیڈا کا کہنا ہے کہ معاملہ کی جاچ کی جا رہی ہے اور دونوں فریقین کے دو درجن سے زائد افراد کے خلاف رپورٹ درج کی گئی ہے۔

یہ بھی پڑھیں: کانوڑ یاترا میں رام مندر اور ترنگے کی دھوم، سیاست میں مذہب اور نیشنلزم کا تڑکا