انتخابی موسم میں اکھیلیش یادو نے کی وعدوں کی برسات

برسراقتدار یوگی حکومت پر اترپردیش کو بیمارو ریاست بنانے کا الزام عائد کرتے ہوئے سماج وادی پارٹی (ایس پی) کے قومی صدر اکھیلیش یادو نے بدھ کے روز وعدوں کی جھڑی لگا دی۔

یادو نے کہا کہ بی جے پی کی تنگ ذہنیت سے سماج کے مختلف طبقات میں تناؤ ہے۔ ریاست میں بی جے پی نے ترقی روک کر دھوکہ کیا ہے۔ وہ جمہوریت کے لیے خطرہ بن گئی ہے۔ ایس پی کارکنان گاؤں گاؤں جا کر بی جے پی کی سازشوں کا پردہ فاش کریں گے۔ ان کی وعدہ خلافی کو سب کے سامنے لائیں گے۔

انہوں نے کہا کہ بی جے پی کے ساڑھے چار سال کی حکومت میں ریاست کے عوام کو قدم قدم پر پریشانیاں اٹھانا پڑ رہی ہیں۔ بی جے پی نے اس ریاست کو گندگی کے ڈھیر میں بدل دیا۔ کورونا وبا کے بعد اب چاروں جانب ڈینگو اور وائرل بخار سے عوام پریشان ہیں۔ فیروزآباد میں 90 سے زیادہ بچوں کی موت ہوچکی ہے۔ فرخ آباد میں 50 کی موت ہوئی ہے۔ کانپور میں 50 سنگین بیمار ہیں جن میں 7 کی موت ہوئی ہے۔ آگرہ، بریلی اور باغپت میں پلیٹ لیٹس کی کمی کا بحران ہے، جھانسی میں بیڈ کی ماراماری، مرد وارڈ میں داخل ہوئیں خواتین۔ کاس گنج، متھرا میں 14 موتیں ہوئی ہیں۔ رائے بریلی، اناؤ میں بھی صورتحال بد تر ہے۔

ڈینگو متاثرہ کو مناسب علاج نہیں مل رہا ہے۔ وزیراعلیٰ بڑی بڑی باتیں کرتے ہیں،دعوے کرتے ہیں لیکن حقیقت میں بدعنوان انتظامی مشینری اب ان کی باتوں پر توجہ نہیں دیتی ہے۔ وزیراعلیٰ کی ٹیم الیون اور ٹیم نائن کا ان دنوں کہیں اتا پتا نہیں ہے۔

انہوں نے کہا کہ بی جے پی حکومت نے چند سرمایہ کاروں کے سوا سماج میں ہر کسی کے ساتھ ناانصافی کی ہے۔ سماج وادی حکومت بنی تو کسانوں کو پہلے جیسی سہولتیں ملیں گے۔ بنکروں کو بجلی فکس فلیٹ ریٹ پر ملے گی۔ غریب خواتین کو سماجوادی پینشن جاری کی جائے گی۔ ٹیچر امیدواروں اور شکشا متروں کو انصاف ملے گا۔ نوجوانوں کے روزگار کا انتظام ہوگا۔ تاجروں کے مسائل حل ہوں گے۔