اسٹیون اسمتھ بلے بازوں میں بدستورسر فہرست

پہلے ایشز ٹیسٹ میں غیرمتاثر کن کارکردگی کے باوجود بالرز میں جیمز اینڈرسن کا ٹاپ پوزیشن پر قبضہ برقرار ہے۔ آئی سی سی نے آسٹریلیا اور انگلینڈ کے درمیان ایشز سیریز کے پہلے ٹیسٹ اور ہندستان اور سری لنکا کے درمیان دوسرا ٹیسٹ ختم ہونے کے بعد تازہ ترین ٹیسٹ پلیئرز رینکنگ جاری کر دی ہے۔

پہلے ایشز ٹیسٹ میں 141 رنز کی ناقابل شکست اننگز کھیل کر مین آف دی میچ کا ایوارڈ حاصل کرنے والے آسٹریلین کپتان اسٹیون اسمتھ بلے بازوں میں بدستور پہلے نمبر پر براجمان ہیں۔

سری لنکا کے خلاف دوسرے ٹیسٹ میں سنچری بنانے والے چتیشور پجارا دو درجے ترقی پا کر دوسرے نمبر پر پہنچ گئے البتہ انگلش کپتان جو روٹ اور کیوی قائد کین ولیمسن تنزلی کے بعد بالترتیب تیسرے اور چوتھے نمبر پر چلے گئے۔

سری لنکا کے خلاف شاندار ڈبل سنچری اسکور کرنے کے باوجود ہندستانی کپتان وراٹ کوہلی پانچویں اور وارنر چھٹے نمبر پر برقرار ہیں جبکہ اظہر علی ایک درجہ ترقی پا کر آٹھویں نمبر پر آ گئے۔ ہندستان کے لوکیش راہل تنزلی کے بعد نویں نمبر پر چلے گئے جبکہ ڈین ایلگر ترقی پا کر ٹاپ ٹین میں شامل ہو گئے ہیں، دیگر کھلاڑیوں میں مرلی وجے ترقی کے ساتھ 28ویں نمبر پر آ گئے۔

بالرز میں پہلے ایشز ٹیسٹ میں مایوس کن کھیل پیش کرنے کے باوجود انگلش فاسٹ بالر جیمز اینڈرسن سرفہرست ہیں، رویندرجڈیجہ ترقی پا کر دوسرے نمبر پر آ گئے ہیں جبکہ روی چندرن ایشون چوتھے، رنگنا ہیرات پانچویں نمبر پر موجود ہیں۔ آسٹریلین فاسٹ بالر مچل اسٹارک ترقی پا کر ٹاپ ٹین میں شامل ہو گئےہیں۔ جبکہ اسٹورٹ براڈ تنزلی کے بعد ٹاپ ٹین سے باہر ہو گئے ہیں۔ آل راؤنڈرز میں شکیب الحسن سرفہرست ہیں۔