لگاتار 22 فیصلہ کن ٹسٹ میچوں کے بعد پہلا ٹسٹ برابر

ویسٹ انڈیز اور زمبابوے کے درمیان بلاوالومیں کھیلا گیا دوسرا ٹسٹ میچ بغیر کسی فیصلے کے ختم ہوا۔ زمبابوے نے پہلے بلے بازی کرتے ہوئے اپنی پہلی اننگ میں326 رن بنائے تھے۔ ویسٹ انڈیز نے اپنی پہلی اننگ میں448 رن بناکر122 رن کی سبقت حاصل کرلی تھی۔دوسری اننگ میں46 کے اسکور پر جب زمبابوے کے چار کھلاڑی آوٹ ہوگئے تھے تو ایسا لگ رہا تھا کہ یہ ٹسٹ فیصلہ کن ہوگا مگر سکندر رضا ( 89) اور رگس چاکابوا(71) نے شاندار بلے بازی کرکے اپنی ٹیم کو شکست سے بچالیا۔

سال 2017 میں یہ لگاتار 22 فیصلہ کن ٹسٹ میچوں کے بعد پہلا ٹسٹ برابرہوا۔ اس سال جو پچھلا آخری ٹسٹ برابر ہوا تھا وہ مارچ میں نیوزی لینڈ اور جنوبی افریقہ کے درمیان ہملٹن میں کھیلا گیا تھا ۔ جس کے بعد لگاتار22 ٹسٹ میچ فیصلہ کن رہے تھے۔

موجودہ سال میں ابھی تک جو37 ٹسٹ میچ کھیلے گئے ہیں اس میں33 ٹسٹ میچ فیصلہ کن رہے ہیں۔ نیوزی لینڈ اور جنوبی افریقہ کے درمیان ڈیونیڈن میں اور ہندوستان اور آسڑیلیا کے درمیان رانچی میں ٹسٹ برابر رہے تھے۔

ٹسٹ کرکٹ میں یہ دوسرا موقع ہے جب لگاتار22 ٹسٹ فیصلہ کن رہے۔اس سے قبل دسمبر1884 اور مارچ 1892 کے درمیان بھی لگاتار 22 ٹسٹ فیصلہ کن رہے۔ 2017 میں لگ بھگ 90 فیصد ٹسٹ میچوں کا فیصلہ ہوا۔

گزشتہ سال یعنی 2016 میں جو47 ٹسٹ کھیلے گئے تھے اس میں 40 کا فیصلہ ہوا تھا اور باقی سات ٹسٹ ڈرا رہے تھے۔ لگ بھگ85 فیصد ٹسٹ اس سال فیصلہ کن رہے تھے۔2015 میں43 میں سے 34 ٹسٹ فیصلہ کن رہے تھے اورباقی نو ٹسٹ برابر رہے تھے۔ اس سال لگ بھگ80 فیصد ٹسٹ میچ فیصلہ کن رہے تھے۔ سال 2014 میں بھی کچھ ایسا ہی ہوا تھا اس سال41 میں سے33 ٹسٹ میچوں کا فیصلہ ہوا تھا جبکہ آٹھ ٹسٹ میچ برابر رہے تھے۔اس سال لگ بھگ81 فیصد ٹسٹ میچوں کا فیصلہ ہوا تھا۔

پہلے ٹسٹ میچ کافی تعداد میں برابر رہتے تھے مگر اب ایسا نہیں ہوتا اس کی ایک وجہ ایک دن میں کم سے کم90 اوور کا ہونا بھی ہے۔ پہلے پانچ دن کے ٹسٹ میچ میں چار سو سے زیادہ اوور نہیں ہوتے تھے جبکہ اب 450 سے زیادہ اوور ہوتے ہیں۔

گذشتہ سات سال میں جو168 ٹسٹ ہوئے ہیں اس میں سے140 فیصلہ کن رہے ہیں یعنی اس وقفہ میں83 فیصد ٹسٹ فیصلہ کن رہے ہیں۔ جنوری 2014 کے بعد جس ملک میں سب سے زیادہ ٹسٹ میچوں کا فیصلہ ہوا وہ سری لنکا ہے۔ سری لنکا میں21 میں سے 20ٹسٹ میچوں کا فیصلہ ہوا۔ یہاں ہر ٹسٹ میں اوسط334 اوور میں فیصلہ ہوا۔انگلینڈ میں 28 میں سے25، متحدہ عرب امارات میں15 میں سے13، زمبابوے میں سات میں سے چھ، ہندوستان میں17 میں سے14 جنوبی افریقہ اور ویسٹ انڈیز میں بھی 17 میں سے14 ٹسٹ فیصلہ کن رہے۔