شادی کے 50 سال بعد 74سالہ خاتون کے ہاں جڑواں بچے پیدا

حیدرآباد: آندھراپردیش کے ضلع گنٹور میں ڈاکٹروں کی کامیاب کوشش کے بعد ایک 74سالہ خاتون نے دو بچیوں کو جنم دیا ہے۔ ڈاکٹرس نے اس کو عالمی ریکارڈ قرار دیا۔ جڑواں بچوں کی پیدائش کے بعد خاتون کی ماں بننے کی خواہش شادی کے 50سال بعد پوری ہوئی ۔

تفصیلات کے مطابق ضلع مشرقی گوداوری سے تعلق رکھنے والی منگا یما شادی کے 50سال بعد آئی وی ایف کے ذریعہ حاملہ ہوئی۔ڈاکٹرس نے دعوی کیا کہ اس آئی وی ایف کی کامیابی نے قبل ازیں 70سال کی عمر میں کسی خاتون کے ماں بننے کے ریکارڈ کو توڑ دیا ہے۔ڈاکٹر ارونا اور ڈاکٹر اوما شنکرنے اس سرجری کو انجام دیا۔

منگا یما کی زچگی گنٹور کے اہلیا اسپتال میں سیزیرین کے ذریعہ انجام دی گئی۔ اس خصوص میں ڈاکٹر ارونا نے کہا کہ آئی وی ایف کے ذریعہ یہ کام انجام دیاگیا ہے ۔انہوں نے کہا کہ پہلے خاتون کا بی پی، ذیابیطس اور ہائپر ٹنشن کا معائنہ کیا گیا ، جو 70سال کی عمر میں کئے جانے والے عام معائنے ہوتے ہیں۔خوش قسمتی سے منگا یما کو ان میں سے کوئی بھی مرض نہیں تھاجس کے بعد آئی وی ایف کے دو مراحل انجام دیئے گئے۔اس کے بعد کے عمل کی پہلی ہی کوشش میں خاتون حاملہ ہوگئی۔

انہوں نے کہا کہ حاملہ ہونے کے دوران بی پی، ہائپر ٹنشن ہوسکتے ہیں اسی لئے خاتون سے درخواست کی گئی کہ وہ 9 ماہ اسپتال میں ہی رہے جس کے لئے وہ راضی ہوگئی اور 9ماہ تک اسپتال میں ہی وہ رہیں۔اس طرح سیزرین کے ذریعہ دولڑکیوں کی پیدائش ہوئی۔ انہوں نے دعوی کیا کہ دنیا میں یہ ایسا پہلا معاملہ ہے جس میں اتنی زیادہ عمر میں خاتون ماں بنی۔قبل ازیں بھی انہوں نے اسی ضلع میں ایک 60سالہ خاتون کی اسی آئی وی ایف کے ذریعہ حاملہ بننے میں مدد کی تھی۔

ڈاکٹر اوما شنکر نے بتایا کہ اس خاتون کی زچگی کے تعلق سے گزشتہ ایک ماہ سے منصوبہ بندی کی جارہی تھی۔بے ہوش کرنے والے ڈاکٹرس،کارڈیالوجسٹ،دواوں سے متعلق ایک ڈاکٹر،دوپیڈیاٹریشنس،لائف سپورٹ سسٹم کو تیاررکھاگیا تھا۔

ماں بننے پر مسرور منگا یما نے کہاکہ اولاد جن کو نہیں ہے وہ بتاسکتے ہیں اس کی اہمیت کیا ہے؟انہوں نے کہاکہ اس اسپتال میں تمام ڈاکٹر، نرس اور دیگر اسٹاف نے ان کی کافی بہتر طورپردیکھ بھال اور بہتر علاج کو یقینی بنایا۔منگا یما کے شوہر بھی اولاد کی پیدائش پر کافی خوش ہے۔

اس سوال پر کہ اس عمر میں باپ بننے پر وہ کیسا محسوس کرتے ہیں اور وہ کس طرح اپنی دونوں بیٹیوں کی اس عمر میں دیکھ بھال کرپائیں گے؟تو انہوں نے کہاکہ خدا ہی پودا لگاتا ہے اور وہ ہی اس کو پانی دیتا ہے۔اسی طرح وہ ہی ان نوزائیدہ بچیوں کی دیکھ بھال کریں گے، ان کی زندگی کی اب ان کو کوئی پرواہ نہیں ہے کیونکہ وہ باپ بن گئے ہیں۔ماں اور دونوں نوزائیدہ بچیاں تندرست بتائے جا رہے ہیں۔