رمضان کریم پر ’ٹاٹا موٹرس‘ کے اشتہار نے جیتا لوگوں کا دل، دیکھیں ویڈیو...

سوشل میڈیا پر ’ٹاٹا موٹرس‘ کا ایک ویڈیو بہت تیزی کے ساتھ وائرل ہو رہا ہے اور جو بھی اس ویڈیو کو دیکھ رہا ہے وہ’قطرہ قطرہ نیکی‘ گنگناتا ہوا نظر آ رہا ہے۔ ٹاٹا موٹرس نے یہ ویڈیو مبارک مہینہ رمضان کریم کو مدنظر رکھتے ہوئے کچھ دنوں پہلے ہی ریلیز کیا ہے۔ اس ویڈیو کو لوگ خوب پسند کر رہے ہیں اور اس کی وجہ ہے ویڈیو میں موجود بچوں کی معصومیت، خلوص نیتی اور نیکی حاصل کرنے کا جذبہ۔

دراصل ماہِ رمضان میں لوگ اپنی آمدنی میں سے کچھ روپے نکال کر ذکوٰۃ کی صورت میں غریبوں کو دیتے ہیں۔ اسی کو دھیان میں رکھتے ہوئے ٹاٹا موٹرس نے اشتہار تیار کیا ہے۔ تقریباً ساڑھے تین منٹ کے اس ویڈیو میں دکھایا گیا ہے کہ اسکول میں پڑھنے والے بچے اپنے والدین کو خوش کر ’منی بینک‘ میں پیسے جمع کرتے ہیں۔ پھر یہ جمع پیسے سبھی بچے اسکول لے جانے والے بس ڈرائیور کو ایک بیگ میں بھر کر دے دیتے ہیں۔ اس پورے واقعہ کو اس جذباتی انداز میں فلمایا گیا ہے جو کسی کے بھی دل کو چھونے کی صلاحیت رکھتا ہے۔

’قطرہ قطرہ نیکی‘ نغمہ کے ساتھ بنے اس اشتہار کے ذریعہ لوگوں کو نیکی کی ایک ایک بوند اکٹھا کرنے کی ترغیب دی گئی ہے۔ ویڈیو میں یہ بتانے کی کوشش کی گئی ہے کہ آپ کے اندر موجود نیکی کس طرح دوسروں کو فائدہ پہنچا سکتی ہے۔ ویڈیو کے آخر میں جب یہ دکھایا گیا کہ بچے منی بینک سے بھرا بیگ بس ڈرائیور ’رحیم انکل‘ کو دیتے ہیں تو وہ بہت جذباتی ہو جاتے ہیں اور ان کی آنکھیں بھی نم ہو جاتی ہیں۔

یہ پورا ویڈیو سعودی عرب میں شوٹ کیا گیا ہے اس لیے کہیں پر اردو اور کہیں پر عربی زبان کا استعمال کیا گیا ہے۔ لیکن اچھی بات یہ ہے کہ ویڈیو کے نیچے انگریزی میں اس کا ترجمہ بھی چلتا رہتا ہے جسے پڑھ کر آپ یہ سمجھ سکتے ہیں کہ بچے کیا کہنا چاہ رہے ہیں۔