ونیش پھوگاٹ کی نااہلی پر راہل-پرینکا گاندھی کا ردعمل، ’امید ہے کہ مزید طاقت کے ساتھ واپسی کریں گی‘

نئی دہلی: ہندوستانی خاتون ریسلر ونیش پھوگاٹ کو زیادہ وزن کی وجہ سے پیرس اولمپکس کے خواتین ریسلنگ فائنل سے نااہل قرار دے دیا گیا۔ یہ ہندوستانی کشتی اور ملک کے لیے ایک بڑا جھٹکا ہے، کیونکہ ونیش پھوگاٹ گولڈ میڈل جیتنے کے بہت قریب تھیں۔ دریں اثنا، لوک سبھا میں قائد حزب اختلاف اور کانگریس کے رکن پارلیمنٹ راہل گاندھی نے ونیش پھوگاٹ کی نااہلی پر ردعمل ظاہر کیا۔

انہوں نے کہا، ’’ہمیں پوری امید ہے کہ انڈین اولمپک ایسوسی ایشن اس فیصلے کو سختی سے چیلنج کرے گی اور ملک کی بیٹی کو انصاف دلائے گی۔ ونیش ہمت ہارنے والی نہیں ہیں، ہمیں یقین ہے کہ وہ مزید طاقت کے ساتھ اکھاڑے میں واپسی کریں گی۔ ونیش ! آپ نے ہمیشہ ملک کا سر فخر سے بلند کیا ہے ۔ آج بھی پورا ملک آپ کی طاقت بن کر آپ کے ساتھ کھڑا ہے۔‘‘

کانگریس جنرل سکریٹری پرینکا گاندھی واڈرا نے بھی سوشل میڈیا پر ونیش پھوگاٹ کی نااہلی پر تبصرہ کیا۔ انہوں نے ایکس پوسٹ میں لکھا، "پیاری بہن ونیش پھوگاٹ، میں نے آپ کی ہمت، آپ کی محنت اور لگن کو دیکھا ہے۔ آپ اولمپکس میں ملک کی کروڑوں لڑکیوں کے خوابوں کے لیے لڑ رہی تھیں۔ آپ کے شاندار کھیل نے ان کروڑوں لڑکیوں کے خوابوں کو پرواز دی ہے جو چھوٹے شہروں سے آتی ہیں، بہت سے چیلنجوں کا مقابلہ کرتی ہیں، نظام سے لڑتی ہیں، منفی حالات کو شکست دیتی ہیں اور بڑے پلیٹ فارمز تک پہنچنے کی خواہش رکھتی ہیں۔ ‘‘

پرینکا گاندھی نے لکھا، ’’آپ کے شاندار کھیل نے پورے ملک کو فخر سے بھر دیا۔ تمام چیلنجز کا مقابلہ کرتے ہوئے آپ اپنی انتھک محنت سے جس مقام پر پہنچیں وہ آسان نہیں تھا۔ آپ کے اس ناقابل یقین سفر نے لاکھوں خوابوں کو تقویت بخشی ہے۔‘‘

انہوں نے مزید لکھا، ’’اس مشکل وقت میں کروڑوں ہم وطن آپ کے ساتھ اسی جوش و جذبے کے ساتھ کھڑے ہیں جیسے پورے مقابلے کے دوران تھے۔ میری بہن، اکیلا محسوس نہ کریں اور یاد رکھیں کہ آپ ہماری چیمپئن تھیں اور آپ ہمیشہ ہماری چیمپئن رہیں گی۔ مجھے یقین ہے کہ آپ اور بھی مضبوطی سے واپس آئیں گی۔‘‘

دریں اثنا، وزیر اعظم نریندر مودی نے انڈین اولمپک ایسوسی ایشن (آئی او اے) کی چیئرمین پی ٹی اوشا سے ہندوستانی خاتون پہلوان ونیش پھوگاٹ کی پیرس اولمپکس سے نااہلی پر بات کی ۔ وزیر اعظم مودی نے ان سے اس مسئلے اور ونیش پھوگاٹ کے باہر جانے کے بعد ہندوستان کے پاس دستیاب اختیارات کے بارے میں معلومات طلب کی ہیں۔

ذرائع کے مطابق پی ایم مودی نے پی ٹی اوشا سے ونیش کے معاملے میں تمام آپشنز تلاش کرنے کو کہا ہے۔ انہوں نے پی ٹی اوشا سے یہ بھی درخواست کی ہے کہ اگر اس سے ونیش پھوگاٹ کی مدد ہوتی ہے تو اس کی نااہلی کے حوالے سے سخت احتجاج درج کریں۔