قطر: فٹ بال ورلڈ کپ کی کوریج کے دوران امریکی صحافی کی موت، مخصوص ٹی-شرٹ پہننے پر کچھ روز قبل لئے گئے تھے حراست میں

دوحہ: قطر میں ہونے والے فیفا فٹبال ورلڈ کپ کی کوریج کے دوران امریکی صحافی گرانٹ واہل کی موت ہوگئی۔ خیال رہے کہ واہل نے قطر میں ’ایل جی بی ٹی کیو‘ کمیونٹی کی حمایت میں مخصوص رنگوں والی ٹی-شرٹ پہن لی تھی جس کے بعد انہیں مختصر وقت کے لیے حراست میں لیا گیا تھا۔ انہیں 21 نومبر کو الریان کے احمد بن علی اسٹیڈیم میں حراست میں لیا گیا تھا۔ اس وقت واہل سے کہا گیا کہ وہ اپنی ٹی شرٹ اتار دہیں کیونکہ اس ملک میں ہم جنس شادیاں ممنوع ہیں۔

یو ایس ساکر نے جمعہ کی شام اپنے آفیشل ٹوئٹر اکاؤنٹ پر ایک بیان میں کہا، "پورے یو ایس ساکر فیملی کو یہ جان کر دکھ ہوا ہے کہ صحافی گرانٹ واہل ہمارے درمیان سے رخصت ہو گئے ہیں۔ گرانٹ واہل نے فٹ بال کو اپنی زندگی سمجھا تھا اور ان کی شاندار تحریر اب ہمیں نہیں ملے گی۔"

یو ایس ساکر نے کھیل کے لئے صحافی واہل کے جذبے کی ستائش کی اور ان کی اہلیہ سیلائن گونڈر اور لواحقین کے تئيں تعزیت کا اظہار کیا۔ گونڈر نے ٹوئٹر پر یو ایس ساکر کے بیان پوسٹ کیے اور لکھا "میں اپنے شوہر گرانٹ واہل کی فٹ بال فیملی اور بہت سارے دوستوں کی ستائش کے لئے بہت شکر گزار ہوں، میں مکمل صدمے میں ہوں۔"

پرسنل ویب سائٹ کے مطابق، واہل نے اسپورٹس الیسٹریٹڈ کے لیے 11 فٹ بال ورلڈ کپ کا احاطہ کیا تھا اور اس کھیل پر دو کتابیں لکھیں۔ انتقال سے قبل جمعہ کے روز، واہل نے ارجنٹینا-ہالینڈ کے کوارٹر فائنل میچ کے بارے میں بھی ٹوئٹ کیا تھا۔

(یو این آئی ان پٹ کے ساتھ)