پیرس اولمپک 2024: امید پر کھڑے اترے سوپنل، 50 میٹر رائفل تھری پوزیشن میں جیتا کانسے کا تمغہ

پیرس اولمپک 2024 میں ہندوستان کو آج ایک بڑی کامیابی اس وقت لگی جب شوٹر سوپنل کسالے نے کانسے کے تمغہ پر کامیابی کے ساتھ نشانہ لگایا۔ سوپنل نے 50 میٹر رائفل تھری پوزیشنز میں یہ برانز میڈل جیتا اور ہندوستان کا پرچم پیرس میں بلند کر دیا۔

سوپنل کسالے کی یہ جیت تاریخی نوعیت کی ہے، کیونکہ یہ اس زمرہ میں اولمپک میڈل جیتنے والے پہلے ہندوستانی ہیں۔ 29 سالہ اس نشانہ باز کا یہ پہلا اولمپک ہے اور انھوں نے برانز میڈل جیت کر ایک بڑا کارنامہ انجام دیا ہے۔ یہ کھلاڑی 12 سالوں سے اولمپک میں کوالیفائی کرنے کی کوشش کر رہا تھا اور اب جبکہ پیرس میں موقع ملا تو انھوں نے تاریخ رقم کر دیا۔

سوپنل نے آج 451.4 پوائنٹس کے ساتھ برانز میڈل جیتا۔ انھوں نے عالمی نمبر 1 شوٹر کو شکست دے کر یہ کامیابی حاصل کی۔ کسالے ہندوستان کے لیے اولمپک میڈل جیتنے والے محض ساتویں شوٹر ہیں۔ اس پیرس اولمپک میں اب تک تین شوٹرس نے ہندوستان کو تمغہ دلایا ہے۔ منو بھاکر نے 10 میٹر ایئر پسٹل ذاتی اور مکسڈ ایونٹ میں برانز میڈل جیتا۔ ان کے ساتھ سربجوت نے بھی مکسڈ میں یہ تمغہ جیتا تھا۔