پیرس اولمپکس 2024: نیتا امبانی نے اولمپکس کو ہندوستان میں لانے کی وکالت کی

ممبئی/پیرس: ریلائنس فاؤنڈیشن کی چیئرپرسن نیتا امبانی نے پیرس میں اولمپک گیمز 2024 کے آغاز کے ایک دن بعد ہندوستان کے پہلے کنٹری ہاؤس/انڈیا ہاؤس کا افتتاح کرتے ہوئے اولمپکس کو ہندوستان میں لانے کی وکالت کی۔ انہوں نے روایتی ہندوستانی انداز میں چراغ جلا کر انڈیا ہاؤس کا افتتاح کیا۔

افتتاحی تقریب میں ہندوستان اور بیرون ملک کے مہمانوں، بین الاقوامی اولمپک کمیٹی (آئی او سی) کے عہدیداروں اور ہندوستان کی مشہور شخصیات نے شرکت کی۔ اس دوران آئی او سی کمیٹی کے رکن سیر میانگ این جی، انڈین اولمپک ایسوسی ایشن کی صدر پی ٹی اوشا، فرانس میں ہندوستان کے سفیر جاوید اشرف، بی سی سی آئی کے جے شاہ اور اولمپک گولڈ میڈلسٹ ابھینو بندرا شامل ہوئے۔

نیتا امبانی نے انڈیا ہاؤس کی اہمیت بیان کرتے ہوئے کہا، ’’اولمپکس کی تاریخ میں پہلی بار بنائے گئے انڈیا ہاؤس میں آپ کا استقبال ہے۔ آج ہم 2024 کے پیرس اولمپک گیمز میں ایک نیا خواب دیکھ رہے ہیں، یہ خواب 1.4 بلین ہندوستانیوں کا ہے اور وہ ہے ہندوستان کو اولمپکس میں لانے اور اولمپکس کو ہندوستان لانے کا مشترکہ خواب۔ اب وقت آ گیا ہے کہ ایتھنز میں پہلی بار روشن اولمپک کی لو، ہماری قدیم سرزمین ہندوستان میں بھی روشن کی جائے۔‘‘

انہوں نے مزید کہا، ’’وہ دن دور نہیں جب ہندوستان اولمپک گیمز کی میزبانی کرے گا۔ انڈیا ہاؤس کے افتتاح پر یہ ہمارا اجتماعی عزم ہے۔ انڈیا ہاؤس کو ہندوستان کی اولمپک خواہشات کی علامت کے طور پر دیکھا جاتا ہے۔ ہم امید کرتے ہیں کہ یہ ہمارے کھلاڑیوں کے لیے گھر سے دور ایک گھر بن جائے، ایک ایسی جگہ جہاں ہم ان کا احترام کرتے ہیں، ان کے جذبے کو سلام کرتے ہیں اور ان کی کامیابیوں کا جشن مناتے ہیں۔‘‘

نیتا امبانی نے کہا، ’’انڈیا ہاؤس آخری منزل نہیں ہے، یہ انڈیا کے لیے ایک نئی شروعات ہے۔ انڈیا ہاؤس میں، ہم پیرس کے قلب میں ہندوستان کی خوبصورتی، تنوع اور مالا مال وراثت کا تجربہ کرنے کے لیے دنیا کو خوش آمدید کہتے ہیں۔‘‘

اس موقع پر بالی ووڈ گلوکار شان نے اپنی گلوکاری سے اس موقع کو خوب محظوظ کیا۔ ڈھول کی تھاپ سے زائرین کا استقبال کیا گیا۔ اس کے بعد ممبئی کے نابینا بچوں نے روایتی ہندوستانی کھیل ملاکھمب میں شاندار پرفارمنس دی۔

انڈیا ہاؤس پارک آف نیشنز کے پارک ڈی لا ویلیٹ میں واقع ہے اور 27 جولائی سے 11 اگست تک اولمپک گیمز کے دوران مقامی وقت کے مطابق صبح 11 بجے سے رات 11 بجے تک مہمانوں کے لیے کھلا رہے گا۔