پیرالمپکس 2024: ہندوستان نے ’ٹوکیو پیرالمپکس‘ کا ریکارڈ توڑا، پیرس میں سب سے زیادہ تمغہ حاصل کر رقم کی تاریخ

’پیرس پیرالمپکس 2024‘ میں ہندوستانی کھلاڑیوں کی بہترین کارکردگی جاری ہے۔ اب تک ہندوستانی کھلاڑیوں نے رواں پیرالمپکس میں مجموعی طور پر 21 تمغے حاصل کر لیے ہیں جو کہ ملک کے لیے ایک نئی تاریخ ہے۔ دراصل ہندوستانی ٹیم کا پیرالمپکس مقابلوں میں اب تک کی سب سے بہترین کارکردگی ’ٹوکیو پیرالمپکس 2020‘ میں دیکھنے کو ملی تھی جب ہندوستانی کھلاڑیوں نے مجموعی طور پر 19 تمغے حاصل کیے تھے۔ اس مرتبہ تمغوں کی تعداد اب تک 21 پہنچ چکی ہے اور اس میں مزید اضافہ کا امکان بھی ہے۔

ہندوستان کو حاصل اب تک کے 21 تمغوں میں 3 طلائی تمغے، 8 نقرئی تمغے اور 10 کانسہ کے تمغے شامل ہیں۔ ٹوکیو پیرالمپکس 2020 کی بات کی جائے تو ہندوستانی ٹیم نے 5 طلائی تمغے، 8 نقرئی تمغے اور 6 کانسے کے تمغے حاصل کیے تھے۔ تمغوں کے ٹیبل میں ہندوستان کو اس وقت 19واں مقام حاصل ہے۔ ہر بار کی طرح اس بار بھی چین کا دبدبہ تمغوں کے ٹیبل میں جاری ہے۔ سرفہرست چین نے اب تک 51 طلائی تمغوں کے ساتھ 112 تمغے حاصل کر لیے ہیں۔ دوسرے مقام پر برطانیہ ہے جس نے 30 طلائی تمغوں کے ساتھ مجموعی طور پر 59 تمغے حاصل کیے ہیں۔ امریکہ تیسرے مقام پر ہے جس نے بشمول 19 طلائی تمغے مجموعی طور پر 53 تمغے حاصل کر لیے ہیں۔

پیرس پیرالمپکس 2024 میں ہندوستان کی طرف سے اب تک سمت انتل، نتیش کمار اور اونی لیکھرا نے طلائی تمغہ حاصل کیا ہے۔ سہاس یتھیراج، ٹی مروگیسن، یوگیش کتھونیا، اجیت سنگھ، سچن کھلاری، نشاد کمار اور منیش نروال نے نقرئی تمغہ حاصل کرنے میں کامیابی حاصل کی ہے۔ کانسہ کا تمغہ حاصل کرنے والوں میں منیشا رامداس، نتھیا شری سمانتھے سیون، سندر سنگھ گوجر، مریپن تھانگاویلو، دیپتی جیوانجی، مونا اگروال، پریتی پال، روبینہ فرانسس اور نشاش کمار وغیرہ شامل ہیں۔