لکھنؤ کی ہاکی اسٹار ممتاز خان کا میدان میں واپسی کرنے پر اظہار مسرت

بنگلورو: بیونس آئرس میں 2018 یوتھ اولمپک کھیلوں میں 10 گول کرکے ہندوستان کو چاندی کا تمغہ دلانے والی لکھنؤ کی ممتاز خان نے ٹیم کے جوش و جذبے کا اظہار کرتے ہوئے کہا ہے کہ تمام کھلاڑیوں کا گراؤنڈ میں واپسی کرنا نہایت خوشی اور راحت کی بات ہے۔

ہندوستانی جونیئر خواتین ہاکی کھلاڑیوں نے تقریباً چھ ماہ بعد قومی کوچنگ کیمپ کے کھیل کے میدان میں بالآخر واپسی پر خوشی کا اظہار کیا ہے۔ یہ کھلاڑی 5 اکتوبر کو بنگلور کے نیشنل کوچنگ کیمپ پہنچے تھے اور انہیں اس ہفتے کھیلوں کی سرگرمیاں شروع کرنے سے پہلے دو ہفتوں کے لئے لازمی طور پر قرنطین میں رہنا پڑا تھا۔

انہوں نے کہا کہ کھیل کے میدان میں واپسی سے قبل دو ہفتوں تک قرنطین میں رہنا ایک نیا اور چیلنجنگ تجربہ تھا۔ اس نے مجھے اپنے تکلیف دہ دنوں کی یاد دلا دی، جب مجھے اپنی سرگرمی کو محدود کرنا پڑا اور آرام کرنے کا مشورہ دیا گیا۔ مجھے بہت خوشی اور راحت ہے کہ آخر کار ہم کھیل کے میدان میں واپس آئے ہیں۔

ممتاز نے کہا کہ جب ہاکی انڈیا کے قومی پروگرام میں آتے ہیں تو کھلاڑیوں کو فٹنس اور خوراک سے متعلق آگاہ کیا جاتا ہے۔ ہمیں ہمیشہ بتایا جاتا ہے کہ وقفے کے دوران ہمیں کیا کرنا چاہیے، ہمیں یہ سکھایا جاتا ہے کہ اپنے اور اپنے وزن وغیرہ کی دیکھ بھال کیسے کریں۔ جب وہاں کیمپ نہیں ہوتا ہے تو ہم سے ایک خصوصی پروگرام کی پیروی کرنے کو کہا جاتا ہے۔

ممتاز خان نے کہا کہ ہم لاک ڈاؤن کے دوران گھر میں بنیادی ورزش کر رہے تھے اور لاک ڈاؤن ختم ہونے پر ہم اپنی ایروبک فٹنس پر کام کریں گے۔ جب کھلاڑی ہاکی انڈیا کے قومی پروگرام میں آتے ہیں تو فٹنس اور خوراک کے بارے میں بہت زیادہ شعور پیدا کیا جانا اور تربیت دینے کے لئے ایسا محفوظ ماحول مہیا کرنا ہے۔

ممتاز نے اپنی سینئر ساتھیوں سے بھی اظہار تشکر کیا جنہوں نے اپنے قرنطین دورانیے کے دوران ویڈیو کال کے ذریعے ان کو متحرک کیا۔ خواتین کی سینئر ٹیم جو بھی یہاں موجود ہوتی ہے وہ اکثر ہماری حوصلہ افزائی کے لئے ویڈیو کال کرتی اور وہ ہمیں قرنطین میں اپنے تجربے کے بارے میں بتاتی اور ہم اپنے آپ کو کس طرح کنٹرول رکھ سکتے ہیں۔

ممتاز خان نے کہا کہ ہم ہاکی انڈیا اور ایس اے آئی کا شکریہ ادا کرتے ہیں کہ وہ ہمارے قومی کیمپ کو دوبارہ سے شروع کر رہے ہیں۔ انہوں نے کہا کہ جونیئر کور ممکنہ گروپ اپنی پرانی فارم حاصل کرنے اور ایشیا کپ کے لئے تیاری کر رہا ہے جو ورلڈ کپ کے لئے کوالیفائنگ ایونٹ ہوگا۔ انہوں نے مزید کہا کہ مجھے لگتا ہے کہ ہم وبائی مرض شروع ہونے سے پہلے بہت اچھی فارم میں تھے۔ ہم نے اچھی ٹیموں کے خلاف اہم میچ جیتے تھے۔ اب ہمیں اسی تال میں واپسی پر کام کرنے کی ضرورت ہے۔