گولڈن بیٹیاں! انڈر-17 ورلڈ ریسلنگ چمپئن شپ میں ہندوستان کی 4 بیٹیوں نے حاصل کیا طلائی تمغہ، کانگریس نے دی مبارکباد

اردن کے شہر عمان میں اس وقت ’انڈر-17 ورلڈ ریسلنگ چمپئن شپ 2024‘ جاری ہے، جس میں ہندوستان کی خاتون پہلوانوں نے سبھی کو حیران کر دیا ہے۔ ہندوستان کی بیٹیوں نے 4 طلائی تمغے حاصل کیے ہیں جس کے بعد انھیں لگاتار مبارکبادیاں مل رہی ہیں۔ قابل ذکر یہ ہے کہ ہندوستان کے حصے میں اب تک 4 کانسے کا تمغہ بھی آ چکا ہے۔ جہاں تک طلائی تمغہ کا سوال ہے ادیتی کماری، نیہا سانگوان، پلکت اور مانسی لاٹھر نے الگ الگ زمروں میں فائل مقابلے جیتے۔ رونق دہیا اور سائی ناتھ کو برانز میڈل حاصل ہوا ہے۔

ہندوستانی بیٹیوں کی اس کامیابی پر کانگریس نے مبارکباد پیش کرتے ہوئے حوصلہ افزا پوسٹ کیا ہے۔ پارٹی نے اپنے آفیشیل ’ایکس‘ ہینڈل پر لکھا ہے کہ ’’اردن کے عمان میں جاری انڈر-17 ورلڈ چمپئن شپ میں ادیتی کماری، نیہا سانگوان، پلکت اور مانسی لاٹھر نے اپنے اپنے وزن والے زمرہ میں گولڈ میڈل جیت کر تاریخ رقم کر دی۔ ملک کا وقار بڑھانے کے لیے سبھی پہلوانوں کو مبارکباد اور مستقبل کے لیے نیک خواہشات۔‘‘

کانگریس جنرل سکریٹری پرینکا گاندھی نے بھی ’ایکس‘ پر سبھی فاتحین کو مبارکباد پیش کی ہے۔ انھوں نے اپنے پوسٹ میں لکھا ہے کہ ’’اردن میں چل رہی کشتی کی انڈر-17 عالمی چمپئن شپ میں ہماری چار خاتون پہلوانوں نے گولڈ جیت کر ملک کو فخر کا موقع دیا ہے۔ ادیتی کماری، نیہا سانگوان، پُلکت اور مانسی لاٹھر کو بہت بہت مبارکباد۔ پورے ملک کو آپ سبھی پر فخر ہے۔ میں سبھی بیٹیوں کے روشن مستقبل کی دعا کرتی ہوں۔‘‘

ہندوستان کے مشہور و معروف پہلوان بجرنگ پونیا نے تو طلائی تمغہ حاصل کرنے والی انڈر-17 ہندوستانی کھلاڑیوں کو ’گولڈن بیٹیاں‘ کہہ کر مخاطب کیا ہے۔ انھوں نے اپنے پوسٹ میں لکھا ہے کہ ’’ملک کی گولڈن بیٹیاں! ادیتی، مانسی لاٹھر، پُلکت اور نیہا سانگوان۔ اردن کی راجدھانی عمان میں چل رہے انڈر 17 عالمی ریسلنگ میں گولڈ میڈل جیت کر ملک کا نام روشن کیا۔ بہت بہت نیک خواہشات۔‘‘