ایشین گیمز: اسکویش میں بھی ہندوستان کو ملا گولڈ، دلچسپ مقابلے میں ہندوستان نے پاکستان کو 1-2 سے ہرایا

ایشین گیمز میں آج ہندوستان نے اپنا دوسرا طلائی تمغہ حاصل کر لیا ہے۔ ہندوستان کی مردوں پر مشتمل اسکویش ٹیم نے پاکستانی ٹیم کو ایک دلچسپ مقابلے میں شکست دے کر یہ تمغہ حاصل کیا۔ 2014 کے بعد ہندوستانی ٹیم نے پہلی بار ایشیائی کھیلوں میں طلائی تمغہ جیتا ہے۔ ہندوستان کے لیے 18 سالہ ابھے سنگھ نے فائنل میں شاندار کارکردگی کا مظاہرہ کیا اور دباؤ والے حالات میں شاندار کارکردگی پیش کرتے ہوئے ہندوستان کی جھولی میں گولڈ میڈل ڈال دیا۔

ایشیائی کھیلوں میں اسکویش کی بات کی جائے تو آج سے پہلے اس زمرے میں ہندوستان کو واحد طلائی تمغہ 2014 میں حاصل ہوا تھا۔ اس وقت ہندوستان نے ملیشیا کو شکست دے کر تاریخ رقم کی تھی۔ پھر اس کے بعد 30 ستمبر یعنی آج اسکویش میں مردوں کی ہندوستانی ٹیم نے طلائی تمغہ پر قبضہ کیا۔ آج کھیلے گئے فائنل کے تیسرے گیم میں ابھے سنگھ نے پاکستان کے زماں نور کو 7-11، 11-9، 11-7، 9-11، 10-12 سے شکست دے کر ہندوستان کا پرچم سب سے اونچا کر دیا۔ اس سے قبل سورو گھوشال نے اپنے میچ میں محمد عاصم خان کو شکست دی تھی، جبکہ مہیش منگاؤنکر کو ناصر اقبال کے خلاف شکست کا سامنا کرنا پڑا تھا۔

تازہ طلائی تمغہ کے بعد ہندوستان کے تمغوں کی مجموعی تعداد 36 ہو گئی ہے، جن میں 10 طلائی تمغے شامل ہیں۔ اس کے علاوہ ہندوستان کی جھولی میں 13 چاندی کا تمغہ اور 13 کانسے کا تمغہ آیا ہے۔ ہندوستان 36 تمغوں کے ساتھ میڈل ٹیبل میں چوتھے مقام پر قابض ہے۔ آج صبح ہندوستان کو پہلا طلائی تمغہ مکسڈ ڈبلز ٹینس سے آیا جس کے فائنل میں روہن بوپنا اور ریتوجا بھوسلے نے جیت کا پرچم لہرایا۔ شروعاتی سیٹ 6-2 سے ہارنے کے بعد ہندوستانی جوڑی نے شاندار واپسی کی اور انھوں نے سپر ٹائی بریک 4-10 سے جیت کر ایشین گیمز چمپئن بننے کا فخر حاصل کیا۔