انشو ملک نے عالمی کشتی چیمپئن شپ میں چاندی کا تمغہ جیت کر تاریخ رقم کی

اوسلو: نوجوان ہندوستانی خاتون پہلوان انشو ملک نے جمعرات کو یہاں ورلڈ ریسلنگ چیمپئن شپ میں 57 کلوگرام خواتین فری اسٹائل کشتی میں چاندی کا تمغہ جیتا۔ امریکہ کی ہیلن مارولٹس نے 3.59 منٹ تک جاری رہنے والے سونے کے تمغے کے مقابلے میں انشو کو شکست دے کر طلائی تمغہ جیتا۔ انشو نے چاندی کا تمغہ جیت کر نہ صرف پوڈیم (ٹاپ تھری) کے ساتھ مہم ختم کی، بلکہ تاریخ رقم کی۔ دراصل وہ اس چیمپئن شپ میں چاندی کا تمغہ جیتنے والی پہلی ہندوستانی خاتون بن گئی ہیں۔

عالمی چیمپئن شپ کے فائنل میں جگہ بنانے والی ہندوستان کی پہلی خاتون پہلوان بنیں 20 سالہ انشونے مقابلے میں جارحانہ اور مثبت انداز میں آغاز کیا، لیکن آخرمیں مخالف پہلوان نے انہیں شکست دے دی۔ انشو پہلے راؤنڈ کے بعد 1-0 سے آگے تھیں، لیکن دوسرے راؤنڈ میں ہیلن پوری طرح حاوی رہیں۔

امریکی پہلوان نے انشو کا ہاتھ پکڑا اور پھر ٹیک ڈاون موو کے ساتھ 2-1 کی برتری حاصل کر لی۔ اس درمیان انہوں نے انشو کے دائیں ہاتھ کو نہیں چھوڑا اور مزید دو پوائنٹس کے ساتھ 4-1 سے آگے ہوگئیں۔ مخالف پہلوان کی مضبوط گرفت کی وجہ سے انشو کافی تکلیف میں نظرآئیں، لیکن ہیلن نے اپنی گرفت کمزور نہیں ہونے دی اور آخر میں انشو کوچت کرکے جیت درج کی۔ انشو کو میچ کے فورا بعد طبی مدد لینی پڑی۔ وہ ایوارڈ تقسیم کرنے کی تقریب کے دوران ہاتھ کو بیلٹ کاسہارا دیتی ہوئیں نظرآئیں۔

انشو نےسیمی فائنل میچ میں یوکرین کی سولومیا ونّک کے خلاف 11-0 کی تکنیکی برتری (وی ایس یو) کے ساتھ فائنل میں پہنچی تھیں۔ اس سے قبل کوارٹر فائنل میں اس نے منگولیا کی داواچیمیگ ایرکھمبیار کو 5-1، اور پری کوارٹر فائنل میں قزاقستان کی نیلوفر رائمووا کو وی ایس یو1 سے 15-5 سے شکست دی تھی۔