ٹوکیو اولمپک میں تمام کھلاڑی اپنی بہترین کارکردگی کا مظاہرہ کریں گے: صدر اسپورٹس کونسل

نئی دہلی: آل انڈیا اسپورٹس کونسل کے صدر پروفیسر وجے کمار ملہوترا نے ٹوکیو اولمپک میں جانے والے ہندوستانی دستے کو نیک خواہشات دیتے ہوئے جمعہ کو کہا کہ انہیں پورایقین ہے کہ تمام ہندوستانی کھلاڑی اولمپک میں اپنا اعلیٰ مظاہرہ کریں گے۔ پروفیسر ملہوترا نے کہا کہ ’’بہت سارے کھلاڑیوں نے اولمپک کوالیفائر مقابلوں میں ابھی تک اپنا بہترین مظاہرہ کیا ہے اورمجھے یقین ہے کہ وہ اولمپک میں اپنا یہ مظاہرہ جاری رکھتے ہوئے ملک کے وقارکو بڑھائیں گے۔

پروفیسر ملہوترا نے کہا کہ پوری دنیا گزشتہ ایک سال سے زیادہ وقت سے کووڈ وبا سے نبردآزما ہے۔ اس کے سبب ٹوکیو اولمپک بھی ایک سال کے لئے آگے بڑھانا پڑا تھا جو اب آخرکار 23 جولائی سے شروع ہو رہا ہے۔ دیگر شعبوں کے علاوہ کووڈ وبا کا کھیلوں پر کچھ زیادہ ہی منفی اثر پڑا ہے۔ اس کی وجہ سے کھلاڑیوں کو پریکٹس اور ٹریننگ کے لئے بہت کم وقت ملا۔ اس دوران کئی کھلاڑی کووڈ کی زد میں آگئے تھے۔ اس دوران اتنی سارے نامساعد حالات کا کھلاڑیوں کے حوصلہ پر بھی منفی اثر پڑا ہے۔ لیکن مجھے فخر ہے کہ ہندوستانی کھلاڑیوں نے ان مشکل حالات کا ڈٹ کر مقابلہ کیا اور اپنے حوصلے کو برقرار رکھتے ہوئے ٹوکیو اولمپک کے لئے کوالیفائی کیا۔

انہوں نے کہا کہ ’’کھیل ہمیں سکھاتا ہے کہ مشکل اورمنفی حالات کے آگے ہار نہیں ماننی چاہیے بلکہ اس کا ڈٹ کر مقابلہ کرتے ہوئے آگے بڑھنا چاہیے۔ کھلاڑیوں کی یہ ہمت دیگر شعبوں کے لوگوں کو بھی کسی بھی مشکل حالات سے نمٹنے کے لئے حوصلہ افزائی کرے گی، ایسا میرا یقین ہے۔ پروفیسر ملہوترا نے ہندوستانی کھلاڑیوں کو دوبارہ نیک خواہشات دیتے ہوئے کہا کہ مجھے یقین ہے کہ وہ ٹوکیو اولمپک میں عمدہ کارکردگی کا مظاہرہ کرتے ہوئے کھیل کی دنیا میں ملک کے وقار کو آگے بڑھائیں گے۔