کیکڑوں کا شکار، مگر گھوڑے پر بیٹھ کر

بیلجیم دنیا کا وہ واحد ملک ہے جہاں ماہی گیر مرد اور اب خواتین بھی گھوڑے پر سوار ہو کر جھینگے پکڑنے کے لیے سمندر میں جاتی ہیں۔ یہ قریب پانچ سو سال پرانی روایت ہے۔ اور اب تک صرف 17 افراد اس سرگرمی سے وابستہ ہیں۔ نیل بیکیرٹ بیلجیم میں پہلی گھوڑ سوار خاتون ماہی گیر ہیں۔انہوں نے اس پیشے کو بچانے کے لیے اسے اختیار کیا۔

'ہارس فشنگ‘ یا گھوڑے پر سوار ہو کر ماہی گیری پانچ سو سال پرانا مگر ایک دم توڑتا پیشہ ہے جو اب صرف بیلجیم میں زندہ ہے۔ یہ 2013ء سے یونیسکو کا عالمی ثقافتی ورثے میں شامل ہے، جس سے اب صرف 17 افراد منسلک ہیں۔ ماہی گیر گھوڑوں کی کولڈ بلڈڈ نسل پر سوار ہو کر کیکڑوں اور مچھلیوں کا جال سمندر میں پھینکتے ہیں۔ گھوڑے اپنی کمر تک پانی کے اندر ہوتے ہیں اور اس کی لہروں کے ساتھ ساتھ تیرتے رہتے ہیں۔

6 سال قبل نیلے بیکرٹ اس صدیوں پرانے پیشے سے منسلک ہوئیں۔ نیلے کا تعلق بیلجیم سے ہی ہے۔ نیلے بیکرٹ کا کہنا ہے، ''یہ بس ناقابل یقین سا احساس ہے۔ آپ اس جانور کی طاقت کو بھرپور طریقے سے محسوس کرتے ہیں، کیسے یہ آپ کو لیے سمندر میں بھاری قدموں سے آگے بڑھتا ہے۔ آپ سمندر کی طرف دیکھتے ہیں اور ہر چیز بہت پرامن نظر آتی ہے۔ ‘‘

گھوڑے کی پیٹھ پر سوار ہو کر کیکڑے اور مچھلیاں پکڑنے کی یہ پانچ سو سال پرانی روایت صرف بیلجیم کے ایک چھوٹے سے ساحلی شہر 'اوسٹ ڈونکیرکے‘ میں زندہ ہے۔

نیلے بیکرٹ اور ان کا گھوڑا آکسل صبح سویرے سے یہ کام شروع کر دیتے ہیں۔ یہ دنیا کی پہلی سرکاری طور پر تسلیم شدہ خاتون گھوڑ سوار ماہی گیر ہیں۔ 2013ء میں یونیسکو نے اس قدیمی پیشے کو عالمی ثقافتی ورثے میں شامل کیا تھا۔

نیلے بیکرٹ کا مزید کہنا ہے، یونیسکو کی طرف سے اس پیشے کو تسلیم کیا جانا ہی دراصل وہ سبب ہے، جس کی وجہ سے انہوں نے یہ پیشہ اختیار کیا۔ اس سے پہلے یہ باقاعدہ مردوں کا کلب تھا، "مجھے خود کو ثابت کرنا تھا، ہاں، مجھے دو گنا خود کو ثابت کرنا پڑا، لیکن میں کامیاب رہی اور اب انہوں نے مجھے پوری طرح قبول کر لیا ہے۔"

نیلے بیکرٹ کو دو سال کی انٹرن شپ کرنا پڑی اور کئی امتحانات پاس کرنا پڑے۔ تین بچوں کی اس ماں کا اصل پیشہ نرسنگ ہے۔ نیلے ایک نرسنگ ہوم میں کام کرتی ہیں۔ اپنے فارغ اوقات میں وہ ساحل پر جاتی ہیں، پانی اترنے سے کم از کم دو گھنٹے پہلے۔

اشٹیفان ہانکے ایک گھوڑ سوار مچھیرے ہے۔ ان کا کہنا ہے کہ اضافی آمدنی کے لیے خواتین مچھلیاں پکڑنے جایا کرتی تھیں، ''بہت عرصہ پہلے، چھوٹے گدھے پر سوار ہو کر مچھلیاں پکڑنے کا کام زیادہ تر خواتین ہی کرتی تھیں۔ مرد کشتیوں کے ساتھ سمندر میں ہوتے تھے۔ اس طرح بچوں کی پرورش کے لیے عورتوں کی اضافی آمدنی ہو جاتی تھی۔‘‘

آج اس علاقے کے 17 رہائشی اس پیشے سے منسلک ہیں۔کاٹرین ٹیرن نامی خاتون بھی اس پیشے کی بقا کے لیے مچھلیاں پکڑنے جاتی ہے۔ ماہی گیری کے لیے گھوڑوں کا استعمال گھوڑوں کی ناپید ہوتی نسلوں کو محفوظ رکھنےکا بھی ایک نایاب موقع ہے۔

کاٹرین ٹیرن کے بقول، "میں تبدیلی دیکھ رہی ہوں۔ لوگ روایات میں دلچسپی لے رہے ہیں۔ ظاہر ہے کہ سب نہیں۔ ایسے لوگ بھی ہیں جو جدیدیت یعنی کمپیوٹر، تیز رفتار انٹرنیٹ، مکمل ڈیجیٹلائزڈ زندگی چاہتے ہیں لیکن کچھ ایسے ہیں جو پرانے زمانے کی زندگی کا تجربہ کرنا چاہتے ہیں۔ جاننا چاہتے ہیں کہ روایتی زندگی کیسی ہوتی تھی۔‘‘

گھوڑوں کے ساتھ ماہی گیری دراصل کیکڑوں کو پکڑنے کا ایک قدیم لیکن ماہی گیری کا انتہائی پائیدار طریقہ ہے۔ جو نشاۃ ثانیہ کی یاد دلاتا ہے۔ اس کا سہرا ان دونوں خواتین گھوڑ سوار ماہی گیروں کے سر ہے۔