امریکہ نے ترکی کے نئے نام ترکیہ کو با ضابطہ طور پر اپنا لیا

امریکی محکمہ خارجہ نے پانچ جنوری جمعرات کے روز اس بات کی تصدیق کی کہ امریکہ نے بھی سرکاری سطح پر اپنے نیٹو اتحادی ملک ترکی کے نام کی تبدیل شدہ نئی ہجے کو اپنا لیا ہے۔ واضح رہے کہ ترکی نے حال ہی میں اپنا نام بدل کر ترکی کے بجائے ترکیہ کر لیا تھا۔

ترک صدر رجب طیب ایردوآن کی حکومت نے دنیا کے تمام ممالک اور بین الاقوامی اداروں سے نام کی تبدیلی کو اپنانے کے لیے کہا تھا، جس کے بعد یہ قدم اٹھایا گیا ہے۔ شمالی امریکی ممالک میں ترکی(Turkey) ایک پرندے کا نام ہے جو، ایک مرغوب غذا بھی ہے۔ نام میں تبدیلی اسی مماثلت سے بچنے کی ایک کوشش ہے۔

جمعرات کے روز امریکہ کا یہ اعلان ایسے وقت ہوا ہے، جب رواں ماہ کے اواخر میں ترکی کے وزیر خارجہ چاؤش اوغلو واشنگٹن کا دورہ کرنے والے ہیں۔

ترکی کے نام کی ہجے میں تبدیلی سب سے پہلے امریکی محکمہ خارجہ کی جانب سے جاری ایک بیان میں ظاہر ہوئی جو، شدت پسند گروپ ''اسلامک اسٹیٹ'' کے مشتبہ فنانسرز کے خلاف امریکہ اور ترکی کی مشترکہ کارروائی کے بارے میں پوسٹ کیا گیا تھا۔

بعد میں امریکی حکام نے اپنے ایک بیان میں نام کی ہجے کی تبدیلی کی باقاعدہ تصدیق بھی کی، تاہم کہا کہ بول چال میں ان کا تلفظ وہی رہے گا۔ محکمہ خارجہ کے ترجمان نیڈ پرائس نے نامہ نگاروں کو بتایا، ''ترک سفارت خانے نے درخواست کی تھی کہ ہم اپنی بات چیت میں اس نئی اسپیلنگ یا ہجے کا استعمال کریں۔''

انہوں نے کہا، ''محکمہ اب اسی ہجے کا استعمال کرے گا، جو آپ نے آج ہمارے عوامی مواصلات سمیت بیشتر سفارتی اور دو طرفہ بیانات میں دیکھا ہے۔'' اس ماہ کے اواخر میں ترکی کے وزیر خارجہ واشنگٹن کا دورہ کرنے والے ہیں اور توقع ہے کہ وہ وہاں یوکرین پر روسی حملے کے ساتھ ہی فن لینڈ اور سویڈن کی جانب سے نیٹو کی رکنیت حاصل کرنے کی کوششوں پر بات چیت کریں گے۔

حالانکہ امریکہ نے نام کی تبدیلی کا اعلان تو کر دیا ہے، تاہم اب بھی تبدیلی کا ابتدائی عمل پوری طرح مکمل نہیں ہوا ہے۔ محکمہ خارجہ کی ویب سائٹ اور خارجی امور کے مینوئل دونوں پر ابھی یہ تبدیلی نہیں نظر آئی ہے۔

سن 2021 میں ترک صدر ایردوآن نے لاطینی رسم الخط کا استعمال کرنے والے ممالک اور بین الاقوامی اداروں سے کہا تھا وہ مستقل طور پر ترکی کے بجائے ترکیہ کا استعمال کریں۔ اقوام متحدہ اور نیٹو نے نام کی تبدیلی کے ساتھ ساتھ کینیڈا، بھارت، آسٹریلیا اور نیوزی لینڈ جیسے ممالک نے یہ تبدیلی کافی پہلے کر لی تھی۔

ترکی(Turkey) کو جب گوگل پر سرچ کیا جاتا ہے تو جمہوریہ ترکی کے سرخ پرچم کے ساتھ ہی ٹرکی نام کے ایک پرندے کی تصویر بھی سامنے آتی ہے۔ جسے امریکہ میں 'تھینکس گیونگ ڈے' کے موقع پر بڑے اہتمام کے ساتھ پکایا اور کھایا جاتا ہے۔ ڈکشنری میں ٹرکی کا ایک مفہوم 'احمق اور بے وقوف شخص' بھی درج ہے۔

صدر رجب طیب ایردوآن کے حکم نامے میں ترکی کو بدل کر ترکیہ کرنے کی وجہ یہ بتائی گئی تھی کہ یہ لفظ ترک قوم کی ثقافت، تہذیب اور اقدار کی نمائندگی کرتا ہے۔ تاہم بعض مبصرین اسے ملک کی ری برینڈنگ کی کوشش قرار دیتے ہیں۔

ترکی گزشتہ کئی برسوں سے اپنی مصنوعات کی برانڈنگ ''میڈ ان ٹرکی'' سے ''میڈ ان ٹرکیہ'' کرنے کی کوشش کرتا رہا ہے۔ صدر رجب طیب ایردوآن نے گزشتہ برس ایک صدارتی حکم نامہ جاری کیا تھا، جس میں کہا گیا تھا کہ تمام رسمی مراسلت اور کاروباری برانڈنگ میں ترکی کے بجائے ترکیہ کا لفظ استعمال کیا جائے۔

حالانکہ ترکی کے عوام کی اکثریت پہلے سے ہی اپنے ملک کو ترکیہ پکارتے ہیں لیکن اس کے باوجود انگریزی میں استعمال کیا جانے والا نام ترکی ملک کے اندر بھی کافی مقبول ہے۔ ترکی کے برآمد کنندگان کی تنظیم نے ملک کی مصنوعات پر جنوری 2020 سے ہی 'میڈ ان ترکیہ' لکھنا شروع کر دیا تھا۔