کشمیر میں دو یورپی سیاح برفانی تودے کے نیچے دب کر ہلاک

کشمیر کے مقامی حکام کا کہنا ہے کہ یکم فروری بدھ کے روز برفانی تودہ گرنے سے پولینڈ کے دو اسکیئرز ہلاک ہو گئے۔ حکام کے مطابق یہ دونوں سیاحتی مقام گلمرگ کے قریب برفانی تودہ گرنے سے برف کے نیچے دب گئے تھے۔ پولیس کے ایک بیان میں کہا گیا ہے کہ اسی ہلاکت خیز واقعے سے 21 دیگر افراد کو بچا لیا گیا۔

پولیس نے کہا، ''امدادی مہم کے دوران، 19 غیر ملکی شہریوں اور دو مقامی گائیڈز کو بچا لیا گیا۔ تاہم بدقسمتی سے دو غیر ملکی شہری برفانی تودے کی زد میں آ کر جان کی بازی ہار گئے۔ ان کی لاشیں بھی نکال لی گئی ہیں۔''

مقبول ترین سیاحتی مقام گلمرگ مغربی ہمالیہ کے پیر پنجال پہاڑی سلسلے میں واقع ہے۔ یہ جگہ پورے سال سیاحوں اور اسکیئرز کو اپنی جانب راغب کرتا ہے، اور بھارت سمیت غیر ملکی سیاحوں میں بھی کافی مقبول ہے۔

موسم سرما میں یہاں زبردست برف باری ہوتی ہے اور اسی مناسبت سے بڑی تعداد میں سیاح یہاں برف سے متعلق اسپورٹس میں حصہ لینے کے لیے آتے ہیں۔ گلمرگ اور اس کے آس پاس کے تمام علاقے بھارتی افواج کے سخت کنٹرول میں ہیں، کیونکہ یہ پاکستان اور بھارت کے درمیان کی عملی سرحد یا لائن آف کنٹرول کے پاس واقع ہے۔

بلند ترین پہاڑیوں سے گھرے اس علاقے میں برفانی تودے متنازعہ سرحد کے قریب تعینات بھارتی اور پاکستانی فوجوں پر بعض اوقات ہلاکت خیز اثرات مرتب کرتے ہیں۔ متعدد بار ایسے برفانی تودے گرنے سے اب تک کافی فوجی ہلاک ہو چکے ہیں۔

سن 2010 میں گلمرگ میں عسکری تربیت کے دوران برفانی تودہ گرنے سے کم از کم 17 فوجی ہلاک ہو گئے تھے۔