کمبوڈیا میں کیسینو ہوٹل میں آتشزدگی، متعدد افراد ہلاک

کمبوڈیائی پولیس کے مطابق کمبوڈیا کے سرحدی علاقے پوئی پٹ میں جوئے کے لیے مشہور ایک ہوٹل میں بدھ کی رات آگ لگنے سے کم از کم دس افراد ہلاک اور 50 دیگر زخمی ہو گئے۔ ہوٹل کی نچلی منزل میں لگنے والی آگ جلد ہی کثیر منزلہ کیسینو ہوٹل کی پوری عمارت میں پھیل گئی۔

صوبائی پولیس کمشنر میجر جنرل سیتھی لوہ نے ہلاکتوں کی تصدیق کرتے ہوئے بتایا کہ آتش زدگی کا یہ واقعہ مقامی وقت کے مطابق رات تقریباً ساڑھے گیارہ بجے پیش آیا۔ انہوں نے بتایا کہ جمعرات کی صبح تک ہوٹل جلتا رہا۔

کمبوڈین پولیس کے مطابق ڈائمنڈ سٹی گرینڈ ہوٹل میں جس وقت آگ لگی اس وقت تقریباً 400 افراد موجود تھے۔ ان میں بہت سے غیر ملکی بھی شامل تھے۔ دنیا بھر سے لوگ جوا کھیلنے کے لیے اس ہوٹل میں آتے ہیں۔ انہوں نے مزید بتایا کہ ہلاک ہونے والے افراد کی لاشوں اور زخمیوں کو مقامی ہسپتالوں میں منتقل کر دیا گیا ہے۔

بچاو اور راحت کا کام کرنے والی ایک تھائی تنظیم روام کتانیو فاونڈیشن کے ایک رضاکار نے بتایا کہ آگ ہوٹل کی نچلی منزل سے شروع ہوئی لیکن بڑی تیزی سے کثیر منزلہ عمارت میں پھیل گئی۔

آگ پر قابو پانے اور راحت اور بچاو کاموں میں تعاون کے لیے کمبوڈیائی حکام نے تھائی لینڈ سے مدد کی اپیل کی، جس کے بعد بنکاک نے دس امدادی گاڑیاں اور پانچ فائر ٹنڈر فراہم کیے۔ تھائی لینڈ کے سرکاری ٹیلی ویژن چینل، پی بی ایس، کے مطابق جس وقت ہوٹل میں آتش زدگی کا واقعہ پیش آیا اس وقت بہت سے تھائی شہری بھی اس میں موجود تھے اور تقریباً 50 تھائی شہری اس میں پھنس گئے۔

تھائی وزارت خارجہ نے بتایا کہ زخمیوں کو تھائی لینڈ کے ساکائیو خطے کے ہسپتالوں میں داخل کرایا گیا ہے۔ ساکائیو خطے کے گورنر پارنیا پھوتیست نے بتایا کہ 32 تھائی شہریوں کا ہسپتالوں میں علاج چل رہا ہے جب کہ ایک کی موت ہو گئی۔

خیال رہے کہ کمبوڈیا میں جوئے خانے اس کی سیاحتی صنعت کا ایک اہم حصہ ہیں۔ جن ایشیائی ملکوں میں جوا کھیلنا قانوناً ممنوع ہے وہاں کے شہری بڑی تعداد میں جوا کھیلنے کے لیے کمبوڈیا کا رخ کرتے ہیں۔ کمبوڈیا نے دارالحکومت نوم پین کے علاوہ ویت نام اور تھائی لینڈ کی سرحدوں سے ملحق علاقوں میں بڑے پیمانے پر جوئے خانے کھول رکھے ہیں۔