چین میں پریس کی آزادی مسلسل زوال پذیر، رپورٹ

غیر ملکی صحافیوں کی تنظیم فارن کارسپونڈنٹس کلب آف چائنا (ایف سی سی سی) نے پریس کی آزادی کے حوالے سے پیر کے روز ایک رپورٹ جاری کی۔ اس رپورٹ میں کہا گیا ہے کہ چین میں میڈیا کی آزادی جس تیزی سے زوال پذیر ہے اس پر ایف سی سی سی انتہائی پریشان ہے۔

ایف سی سی سی کے سروے میں 100 سے زائد غیر ملکی صحافیوں نے حصہ لیا۔ ان میں سے 99 فیصد کا کہنا تھا کہ ان کا احساس ہے کہ چین میں میڈیا اہلکاروں کے لیے کام کرنے کے حالات بین الاقوامی میعارات پر پورا نہیں اترتے۔

سروے میں حصہ لینے والوں میں سے تقریباً نصف کا کہنا تھا کہ انہیں بہت کم اسٹاف کے ساتھ کام کرنا پڑ رہا ہے۔ چونکہ چینی حکام ویزا کی منظوری میں کافی تاخیر کر رہے ہیں اس لیے دیگر صحافیوں کو بیجنگ لانا ان کے لیے ممکن نہیں ہو پا رہا ہے۔

سروے میں حصہ لینے والوں میں 88 فیصد، جنہوں نے سن 2021 کے دوران چین کے شمال مشرقی صوبے سنکیانگ کا سفر کیا تھا، کا کہنا تھا کہ اس دوران ان پر نگاہ رکھی گئی، جبکہ 34 فیصد صحافیوں کا کہنا تھا کہ ان سے تصاویر اور ویڈیوز حذف کرنے کے لیے کہا گیا۔ خیال رہے کہ بین الاقوامی مذمت کے باوجود سنکیانگ میں چین کے ایغور نسلی اقلیتوں کے خلاف سیکورٹی فورسز کی کارروائی اب بھی جاری ہے۔

ایف سی سی سی کا کہنا ہے کہ حکومت کی حمایت یافتہ آن لائن ہراسانی کی وجہ سے صحافیوں کے لیے اپنی پیشہ ورانہ ذمہ داریاں ادا کرنا اور بھی مشکل ہو جاتا ہے۔

ایسے میں جبکہ بیجنگ سرمائی اولمپکس کے آغاز میں چند روز باقی رہ گئے ہیں، سروے میں حصہ لینے والے 127 صحافیوں میں سے 60 فیصد نے منتظمین کے ذریعہ کھیلوں کے بارے میں ناکافی اطلاعات فراہم کرنے کی نکتہ چینی کی۔

تیئس فیصد کا کہنا تھا کہ وہ اولمپکس کمیٹی کے ذمہ دار حکام سے رابطہ کرنے میں بھی ناکام رہے ہیں جبکہ 32 فیصد کا کہنا تھا کہ انہیں ان کھیلوں کی رپورٹنگ کرنے کی بھی اجازت نہیں دی گئی ہے جس کی اجازت دیگر میڈیا کو ہے۔

سروے میں شامل صرف دس فیصد کا کہنا تھا کہ انہیں اولمپکس کے افتتاح سے قبل منعقد ہونے والے پروگراموں میں شرکت کی اجازت ملی۔ ایف سی سی سی کا کہنا ہے کہ نامہ نگاروں کو تقریبات منعقد ہوجانے کے بعد پریس بیانات کے ذریعہ ہی کچھ تفصیلات مل پارہی ہیں۔ ایف سی سی سی نے اپنی رپورٹ میں کہا ہے کہ چین میں ایک عرصے سے میڈیا کی آزادی زوال پذیر ہے۔

ایف سی سی سی کے مطابق بیشتر میڈیا تنظیمیں چین سے باہر کے غیر ملکی صحافیوں کو اولمپکس کھیلوں کو کور کرنے کے لیے بھیجنے کا منصوبہ بنا رہے ہیں، جس کے لیے انہیں ببل قرنطینہ میں رہنا ہوگا۔ سروے میں شامل ہونے والے 90 فیصد افراد کا کہنا تھا کہ اولمپکس ببل قرنطینہ میں رہنے کا ان کا کوئی ارادہ نہیں ہے۔

ایف سی سی سی کی رپورٹ میں کہا گیا ہے کہ جن غیر ملکی صحافیوں کے لیے چین میں رہنا مشکل ہو گیا ہے وہ اب تائی پے، سنگاپور، سڈنی اور لندن سے اپنا کام کر رہے ہیں۔

ایف سی سی سی کا کہنا ہے کہ ہانگ کانگ اب غیر ملکی صحافیوں کے لیے پسندیدہ مقام نہیں رہ گیا ہے کیونکہ چین نے غیر ملکی صحافیوں کو وہاں سے نکالنا اور گرفتار کرنا جبکہ مقامی صحافیوں کو جیلوں میں ڈالنا شروع کر دیا ہے۔

دسمبر 2021 میں جمہوریت نواز نیوزویب سائٹ اسٹینڈ نیوز کو پولیس کی طرف سے چھاپے ماری کے بعد اپنا کام بند کرنے کے لیے مجبور ہونا پڑا۔ اس کے موجودہ اور سابق عملے کو گرفتار بھی کر لیا گیا۔

گزشتہ برس جون میں پولیس نے جمہوریت نواز اخبار ایپل ڈیلی کے دفاتر پر چھاپے مارے تھے اور اخبار کے عہدیداروں کو "ایک بیرونی ملک سے ساز باز" کے الزام میں گرفتار کرلیا تھا۔