جرمنی میں پیٹرول کی قیمت کتنی ہو چکی ہے؟

جرمنی میں بھی پیٹرول اور ڈیزل کی قیمتیں بہت تیزی سے بڑھ چکی ہیں۔ گزشتہ برس اپریل میں پیٹرول کی فی لیٹر قیمت 1.43 یورو تھی، جو رواں برس جنوری میں 1.57 یورو تک پہنچ چکی تھی۔

لیکن یوکرین پر روسی حملے اور اس کے نتیجے میں مغربی ممالک کی جانب سے روس پر عائد کردہ پابندیوں کے سبب پیٹرول کی قیمت 2.20 یورو سے بھی تجاوز کر گئی تھی۔ اسی طرح ڈیزل کی فی لیٹر قیمت بھی گزشتہ برس اپریل میں 1.29 یورو تھی، اس سال جنوری میں 1.50 یورو تھی جو مارچ میں بڑھ کر 2.30 یورو سے تجاوز کر چکی تھی۔

اب جرمنی کی وفاقی حکومت پیٹرول اور ڈیزل پر عائد ٹیکسوں میں کمی لا کر ان کی قیمتیں کم کرنے کا ارادہ رکھتی ہے۔ لیکن سوال یہ ہے کہ حکومتی کوششوں کے نتیجے میں پیٹرول و ڈیزل کی نئی ممکنہ قیمت کتنی کم ہو سکتی ہے۔

جرمن حکومت پیٹرول اور ڈیزل کی قیمتیں دو یورو سے کم رکھنے کا ارادہ رکھتی ہے۔ رواں ہفتے ٹیکس میں کمی سے متعلق جو منصوبہ سامنے آیا ہے اس کے مطابق ڈیزل پر 14 سینٹ اور پیٹرول پر 30 سینٹ ٹیکس کم کیا جائے گا۔ مجموعی طور پر پیٹرول 35 سینٹ اور ڈیزل 17 سینٹ تک فی لیٹر کم کرنے کا امکان ہے۔

جرمنی میں ٹیکس کا نظام نسبتاﹰ پیچیدہ ہے، تاہم وفاقی اور علاقائی ٹیکسوں اور فیول ڈیویلپمنٹ ٹیکس کو پیش نظر رکھ کر دیکھا جائے تو ڈیزل کی نئی فی لیٹر قیمت دو یورو سے کچھ زائد اور سپر ای ٹین پیٹرول کی فی لیٹر قیمت 1.73 یورو ہو سکتی ہے۔

جرمن موٹر ایسوسی ایشن اے ڈی اے سی کا تاہم کہنا ہے کہ یہ رقم بھی عام صارفین کے لیے زیادہ ہے اور حکومت اب بھی فیول پر عائد متعدد طرح کے ٹیکس وصول کر رہی ہے جن میں کمی لا کر صارفین کو مزید سہولت فراہم کی جا سکتی ہے۔