ناروے کی حکومت نے ہم جنس پسندوں سے معافی کیوں مانگ لی

گزشتہ ہفتے ہی ناروے کے وزیر اعظم یونس گار سٹورے نے ہم جنس پسندوں سے سرکاری طور پر معافی مانگی اور اس امر کا اعتراف کیا کہ مختلف جنسی میلانات اور رحجانات کے حامل افراد کے خلاف بنائے گئے اس قانون کے تحت ہم جنس پسند افراد ریاستی سطح پر تفریق کا نشانہ بنے تھے۔

ناروے میں سن 1902 تا 1950ء ہم جنس پسندوں کے مابین جنسی تعلق کو مجرمانہ نوعیت کا ایک عمل بنا دیا گیا تھا۔ تاہم اکیس اپریل سن 1972 کو اس قانون کو کالعدم قرار دے دیا گیا تھا۔

اس قانون کے خاتمے کے پچاس برس بعد ناروے کی حکومت نے ریاستی سطح پر ہم جنس پسندوں سے معذرت کی ہے۔ ناروے میں اس قانون کے تحت 119 افراد کو سزائیں سنائیں گئی تھیں۔

نارویجین وزیر اعظم سٹورے نے کہا کہ 'نہ صرف اس قانون سازی بلکہ ہم جنس پسندوں کے خلاف مختلف پابندیاں عائد کر کے ہم نے بطور ایک قوم اور معاشرے یہ پیغام دیا تھا کہ ہم ایسے لوگوں کے پیار کے حق میں نہیں ہیں۔ آج حکومت اس بات پر ہم جنس پسندوں سے معذرت خواہ ہے‘۔

ناروے میں سن انیس سو بہتر میں ہم جنس پسندی کے خلاف تمام تر قوانین کو ختم کر دیا تھا۔ اس ملک میں سن 1993 میں ہم جنس پسندوں کو سول پارٹنر شپ کی اجازت دیتے ہوئے قانونی تحفظ فراہم کیا گیا تھا۔

اس اقدام کے نتیجے میں سویڈٰن کے بعد ناروے دنیا کا ایسا دوسرا ملک بن گیا تھا، جہاں ہم جنس پسندوں کو قانونی تحفظ دینے کی خاطر باقاعدہ قانون سازی کی گئی تھی۔

سن دو ہزار نو میں ناروے کی حکومت نے ہم جنس پسند مردوں یا عورتوں کے مابین شادی کو بھی قانونی حیثیت دے دی تھی۔ اس قانون کے تحت ہم جنس شادی شدہ افراد کو وہی حقوق دیے گئے تھے، جو دیگر شادی شدہ افراد کو حاصل ہیں۔

ناروے کی کلچر اور صنفی حقوق کی وزیر انیتا ٹریٹیبرگ سٹیون نے کہا ہے کہ اس قانون نے بہت سے زندگیوں کو تباہ کیا تھا۔ وہ خود بھی ہم جنس پسند ہیں۔ ان کے بقول حکومت کی طرف سے سرکاری معافی سے ہم جنس پسندوں کے خلاف فرسودہ خیالات کے خاتمے میں مزید مدد ملے گی۔