ہوش اڑا دینے والی رپورٹ، بچوں کا جنسی استحصال: کئی مذہبی تنظیموں کے خلاف تحقیقات

اس انکوائری میں سن 2015 سے لے کر سن 2020 کے دوران متعدد مذہبی تنظیموں کی چھتری تلے رونما ہونے والی سرگرمیوں اور کارروائیوں کا تفصیل سے جائزہ لیا گیا۔ اس دوران یہ واضح ہوا کہ بچوں کے ساتھ اس استحصالی عمل میں ملوث افراد یا تو مذہبی تنظیموں کے ملازم تھے یا پھر ان سے وابستہ افراد تھے اور جنسی استحصال کے تمام واقعات کو رپورٹ بھی نہیں کیا گیا ہے۔

بچوں کے جنسی استحصال میں ملوث کل اڑتیس تنظیموں کا احوال اس خصوصی رپورٹ میں شامل ہے۔ ان کا تعلق مسیحی مذہبی گروپ ژاہووا وِٹنیس، باپٹیسٹ، میتھوڈسٹ، اسلام، یہودیت، ہندومت، سکھ مت اور نان کنفرمسٹ مسیحی حلقوں سے ہے۔

اس انکوائری کو مرتب کرنے کے لیے تفتیش کاروں نے دو ہفتے تک مختلف مذاہب کے لیے کام کرنے والی تنظیموں کا شکار بننے والے افراد و متاثرین سے شواہد جمع کرنے کے لیے بات چیت بھی کی۔شبہ ظاہر کیا گیا ہے کہ اس عمل میں ملوث دس فیصد افراد ان مذہبی تنظیموں کے ملازمین تھے۔ استحصال کے گیارہ فیصد واقعات افعال تنظیموں کے دفاتر میں ہی رونما ہوئے۔

تفتیش کاروں نے اپنی رپورٹ میں بیان کیا کہ مذہبی تنظیموں سے وابستہ افراد کی یہ استحصالی سرگرمیاں یقینی طور پر طاقت و اختیار کا غلط استعمال تھا۔ ایسے افراد کو مذہبی اکابرین کی سرپرستی اور کسی حد تک حمایت بھی حاصل تھی۔

رپورٹ میں ان استحصالی سرگرمیوں کو انتہائی افسوسناک اور صدماتی قرار دیا گیا کہ ایسی کریہہ کارروائیوں کے لیے انگلینڈ اور ویلز کے علاقوں کو چنا گیا اور ان کا ارتکاب مذہب کے نام پر اور اس کی آڑ میں کیا گیا۔

رپورٹ کے مطابق کئی ایسی تنظیموں کے ضوابط میں بچوں کے جنسی استحصال کے حوالے سے انظباطی کارروائی کرنے کا کوئی حوالہ تک موجود نہیں ہے۔

اس رپورٹ کے تفتیش کاروں نے بیان کیا کہ اس رپورٹ کے افسوس ناک نتائج پر مذاہب کے پیروکار یقین نہیں کریں گے اور ان مندرجات کی صداقت کو تسلیم کرنے کے لیے غیر ضروری بہانے تراشیں گے۔ رپورٹ کے مطابق چار بچے، جن کی عمریں نو برس یا اس سے کم تھیں کو قرآن کی تعلیم دینے والے استاد یا ٹیچر نے مسجد کے اندر جنسی زیادتی کا نشانہ بنایا۔ اس درندہ صفت ٹیچر کو سن 2020 میں سزا بھی سنا دی گئی تھی۔

ایسے ہی ایک اور واقعے کو بیان کیا گیا اور اس کے مطابق ایک لڑکے کو ایوانجیکل تنظیم کے ایک اہم لیڈر نے تنظیم کے دفتر میں اپنی جنسی بھوک کی بھینٹ چڑھایا۔ یہ تنظیم یونائیٹڈ ریفارمڈ چرچ کی تھی۔ اسی تنظیم کے چند اور دفاتر میں بھی اسی اہم لیڈر نے سات سے دس برس کے بچوں کا جنسی استحصال کیا۔ دہائیوں بعد سن 2017 میں اس جنسی استحصال کرنے والے کو انصاف کے کٹہرے میں کھڑا کیا گیا۔

یہ رپورٹ ایسے وقت پر سامنے آئی ہے جب اینجلیکن اور کیتھولک چرچ کی جانب سے بچوں کے جنسی استحصال کے واقعات کی تفتیش پر عوامی رنج اور غصے میں کمی نہیں آئی ہے۔ بچوں کے جنسی استحصال کی نئی حتمی رپورٹ اگلے برس پارلیمنٹ میں تادیبی اقدامات کی سفارش کے ساتھ پیش کی جائے گی۔