گاڑی کی رفتار حد سے بتیس کلومیٹر زیادہ، جرمانہ ایک لاکھ اکیس ہزار یورو

شمالی یورپی ملک فن لینڈ میں پولیس کے مطابق ملزم ایک امیر شہری ہے اور یہ پہلا موقع نہیں ہے کہ اسے بہت بھاری جرمانہ کیا گیا ہے۔ گزشتہ ایک دہائی کے دوران اسی ڈرائیور کو تین مرتبہ اوور سپیڈنگ کی وجہ سے بھاری جرمانہ کیا جا چکا ہے۔ لیکن یہ پہلا موقع ہے کہ جرمانے کی رقم ایک لاکھ یورو کی حد بھی پار کر گئی۔

اسکینڈے نیویا کی جمہوریت اور یورپی یونین کے رکن ملک فن لینڈ میں ٹریفک قوانین کی خاص بات یہ ہے کہ وہاں مقررہ حد سے زیادہ رفتار سے ڈرائیونگ کرنے والے افراد کو جرمانہ ان کی سالانہ آمدنی کے مطابق کیا جاتا ہے۔

پولیس کے مطابق فن لینڈ کے اس شہری کو ایک لاکھ 21 ہزار یورو (129,544 ڈالر کے برابر) جرمانہ کیا گیا ہے۔ جزائر آلینڈ کے سب سے بڑے اخبار نِیا آلینڈ نے لکھا کہ اس ڈرائیور کا نام آندرس وِکلوف ہے اور اسے پولیس نے ویک اینڈ پر اس وقت روکا تھا، جب وہ 50 کلومیٹر کی حد رفتار والے ایک زون میں 82 کلومیٹر فی گھنٹہ کی رفتار سے گاڑی چلا رہا تھا۔

اس اخبار نے اپنی گزشتہ روز کی اشاعت میں لکھا کہ وِکلوف کو اتنا بھاری جرمانہ کرنے کے علاوہ پولیس نے 10 روز کے لیے اس کا ڈرائیونگ لائسنس بھی معطل کر دیا ہے۔ بعد میں اس ڈرائیور نے اخبار نِیا آلینڈ کے ساتھ گفتگو کرتے ہوئے کہا کہ اسے بہت افسوس ہے کہ وہ اوور سپیڈنگ کا مرتکب ہوا۔ ساتھ ہی اس نے کہا، ''مجھے علم تھا کہ میں 70 کلومیٹر کی حد رفتار والے زون سے 50 کلومیٹر فی گھنٹہ کی حد رفتار والے زون میں داخل ہو رہا تھا۔ میں نے اپنی گاڑی کی رفتار کم کرنے کی کوشش کی تو تھی، مگر یہ رفتار بروقت کم نہ ہو سکی تھی۔‘‘

آندرس وِکلوف کو کیے جانے والے تازہ ترین جرمانے سے پہلے حد سے زیادہ رفتار سے گاڑی چلانے کے الزام میں اسے 2018ء میں بھی 63 ہزار 680 یورو (تقریباﹰ 68 ہزار ڈالر) جرمانہ کیا گیا تھا۔ یہی نہیں بلکہ اس سے پانچ سال قبل 2013ء میں بھی اسے ایسے ہی ایک جرم کے ارتکاب پر 95 ہزار یورو (ایک لاکھ دو ہزار ڈالر) جرمانہ کیا گیا تھا۔ یوں اس نوعیت کے تین جرائم پر اسے اب تک کُل تقریباﹰ دو لاکھ اسی ہزار یورو جرمانہ کیا جا چکا ہے۔

آندرس وِکلوف ایک ایسی ہولڈنگ کمپنی کا سربراہ ہے، جو مال برداری، ہیلی کاپٹر سروسز، پراپرٹی کی خرید و فروخت، تجارت اور سیاحت سمیت کئی شعبوں میں متعدد کاروباری اداروں کی مالک ہے۔ اس کے بارے میں یہ بھی مشہور ہے کہ وہ جزائر آلینڈ کا امیر ترین باشندہ ہے۔

جزائر آلینڈ کا علاقہ بحیرہ بالٹک میں فن لینڈ کا ایک قدرے خود مختار ریاستی خطہ ہے۔ یہ خطہ سویڈن کے دارالحکومت سٹاک ہوم اور فن لینڈ کے شہر تُرکُو کے درمیان خلیج بوتھنیا کے دہانے کے قریب ہی واقع جزائر پر مشتمل ہے۔