چینی ویلنٹائنز ڈے پر نوجوانوں کو بچے پیدا کرنے کی ترغیب

چینی ویلنٹائنز ڈے کے موقع پر حکومت نے ایک پیغام میں عوام کو افزائش نسل کے لیے زیادہ بچے پیدا کرنے کی ترغیب دلائی ہے۔ اس پیغام کو خاندانی منصوبہ بندی کے ادارے کی طرف سے نوجوان جوڑوں کے لیے ''صحیح عمر‘‘ میں اولاد پیدا کرنے کی طرف راغب کرنے کا ایک انوکھا طریقہ سمجھا جا رہا ہے۔

یہ پیغام شیان ہیلتھ کمیشن اور خاندانی منصوبہ بندی ایسوسی ایشن کی جانب سے جاری کیا گیا جبکہ نیوز ایجنسی روئٹرز کے مطابق آزاد ذرائع سے اس پیغام کی تصدیق نہیں ہو سکی ہے۔ دریں اثناء ان حکومتی اداروں سے مزید بیان کی درخواست کے باوجود کوئی رد عمل سامنے نہیں آیا۔

یہ پیغام ایک ایسے وقت پر سامنے آیا ہے، جب چین میں خواتین مختلف مشکلات، جیسے کہ بچوں کی اچھی پرورش، مہنگائی اور جنسی استحصال وغیرہ کا سامنا کرتے ہوئے اپنے کیریئر کو پروان چڑھانے کے لیے شادی کرنے اور اولاد پیدا کرنے سے گریز کرتی نظر آ رہی ہیں۔

چین کے چند سرکاری قواعد کے مطابق غیر شادی شدہ خواتین کو اولاد پیدا کرنے میں دشواریوں کا سامنا کرنا پڑتا ہے لیکن اب چین کے ایک شہر سچوان میں 'آزاد یا لبرل لاز‘ کو متعارف کروایا جا رہا ہے۔

پچھلی چھ دہائیوں میں چین میں آبادی کی شرح میں ریکارڈ کمی نوٹ کی گئی ہے جبکہ نوجوانوں کی شرح میں کمی اور عمر رسیدہ آبادی میں اضافہ ہو رہا ہے، جو حکومت کے لیے فکر کا باعث ہیں۔

اس کے سبب گزشتہ مارچ میں بیجنگ حکومت کے چند سیاسی مشیروں نے غیر شادی شدہ خواتین کے لیے جدید طبی طریقوں جیسے کہ آئی وی ایف (آئی وی ایف) ٹریٹمنٹ اور اپنے بیضہ کو منجمد کروانے اور مناسب وقت میں مصنوعی طریقے سے حمل ٹھہرانے کے لیے فرٹیلائزیشن کی نئی سہولیات متعارف کروانے کے تجویز پیش کی تھی۔